Sport

Tom Brady kominn í níunda Super Bowl leikinn sinn á ferlinum

Óskar Ófeigur Jónsson skrifar
Tom Brady fagnar Rex Burkhead sem skoraði snertimarkið sem tryggði Patriots sigurinn.
Tom Brady fagnar Rex Burkhead sem skoraði snertimarkið sem tryggði Patriots sigurinn. Getty/Jamie Squire

New England Patriots og Los Angeles Rams spila til úrslita í Super Bowl í NFL-deildinni í Bandaríkjunum í ár en þetta varð ljóst eftir æsispennandi úrslitaleiki Ameríku- og Þjóðardeildarinnar í nótt.

Það var nefnilega mjög mikil spenna í báðum leikjum og þeir enduðu báðir í framlengingu. Sigursóknirnar voru þó ólíkar því Rams-liðið vann á vallarmarki en Patriots-liðið á snertimarki.



 

Los Angeles Rams vann 26-23 sigur á New Orleans Saints í úrslitaleik Þjóðardeildarinnar en New England Patriots vann Kansas City Chiefs 37-31 í úrslitaleik Ameríkudeildarinnar

Báðir sigurvegararnir voru að spila á útivelli og náðu því lakari árangri á leiktíðinni. Það er aftur á móti ekki spurt að því á úrslitastundu og taugar Patriots- og Rams-manna voru sterkari.



 

Tom Brady og félagar í New England Patriots eru þar með komnir í Super Bowl þriðja árið í röð og þetta verður í níunda skiptið sem fimmfaldi NFL-meistarinn Tom Brady spilar um NFL-titilinn í stærsta íþróttakappleik hvers árs í Bandaríkjunum.

Patriots er aðeins þriðja félagið í sögunni sem kemst í Super Bowl þrjú ár í röð en hin liðin eru Buffalo Bills (1991-1993) og Miami Dolphins (1971-1973). New England Patriots bætti metið sitt með því að komast í ellefta skiptið í þennan risaleik.

Los Angeles Rams er komið í sinn fyrsta Super Bowl leik síðan 2002 en þá var liðið með aðsetur í St Louis. Þetta verður því fyrsti Super Bowl leikur liðs frá Los Angeles síðan 1984 þegar Los Angeles Raiders vann titilinn.



 

 

 

Sigur Los Angeles Rams var mun umdeildari því dómarar leiksins gerðu mjög stór mistök í lokin sem bitnuðu á heimamönnum í New Orleans Saints. Dómararnir höfðu fleiri en eina ástæðu til að dæma víti á einn varnarmann Rams en dæmdu ekkert.

Saints-liðið fór því úr því að vera í dauðafæri til að tryggja sér sigur í framlengingu í því að missa boltann. Rams nýtti sér það, fór upp völlinn og tryggði sér sigurinn með 57 jarda vallarmarki Greg Zuerlein.

Greg Zuerlein var heldur betur öflugur á lokamínútunum því hann tryggði líka liði sínu framlenginguna með 48 jarda vallarmarki 15 sekúndum fyrir leikslok.

New Orleans Saints komst í 13-0 í leiknum og var líka 20-10 yfir. Hrútarnir hættu aldrei og tryggðu sér dramatískan sigur í lokin með smá hjálp frá dómurunum sem „gleyptu“ flautuna á úrslitastundu.



 

Hlauparinn Rex Burkhead tryggði New England Patriots 37-31 sigur á Kansas City Chiefs í framlengingu þegar hann hljóp með boltann í markið á marklínunni. Tom Brady, leikstjórnandi Patriots-liðsins, hafði þá leitt enn eina frábæru sókn liðsins.

Hlauparinn Sony Michel er nýliði en hann er búinn að setja met með því að skora fimm snertimörk í fyrstu tveimur leikjum sínum í úrslitakeppninni. Hann skoraði tvö snertimörk í gær, kom Patriots fyrst í 7-0 og svo í 24-21 í lokaleikhlutanum.

Chiefs lenti 14-0 undir en hlauparinn Damien Williams kom Höfðingjunum tvisvar yfir í seinni hálfleiknum, fyrst 21-17 og svo aftur 28-24. Rex Burkhead kom Patriots yfir í 31-28 39 sekúndum fyrir leikslok með fyrra snertimarki sínu en Chiefs tryggði sér framlengingu með vallarmarki Harrison Butker.

New England Patriots vanns síðan uppkastið og fékk að byrja með boltann í framlengingunni. Það nýtti hinn 41 árs gamli leikstjórnandi Tom Brady sér. Hann keyrði áfram 75 jarda sókn sem tók rétt tæpar fimm mínútur og endaði með snertimarki Rex Burkhead.

Leikmönnum Chiefs tókst ekki að stoppa Patriots liðið og fengu því ekkert tækifæri til að sækja í framlengingunni því með snertimarki Burkhead var leikurinn búinn. Í framlengingu í NFL gildir að það lið vinnur sem skorar fyrst.



 

 

 

 

 

 

NFL Ofurskálin

Mest lesið


Fleiri fréttir

Sjá meira


×

Mest lesið