Landspítalinn hefur slæma upplifun foreldra af sængurlegudeild til skoðunar

Landspítalinn hefur mál nýbakaðra foreldra, sem lýstu ömurlegri upplifun sinni af sængurlegudeild Landspítalans í viðtali við Vísi í vikunni, til skoðunar. Framkvæmdastjóri kvenna- og barnasviðs segir erfitt að segja almennt til um það hvað geti valdið því að sjúklingum sé ekki sinnt á deildinni en ítrekar að spítalinn taki öll slík mál alvarlega.

Vísir greindi frá máli Andra Freys Sverrissonar og Guðrúnar Arndísar Aradóttur, sem eignuðust sitt fyrsta barn í lok maí, í vikunni. Fæðingin gekk erfiðlega fyrir sig og var móður og barni flogið með sjúkraflugi frá Akureyri á Landspítala. Drengurinn var lagður inn á vökudeild og Guðrún inn á sængurlegudeild.

Sjá einnig: Lýsa kaldranalegu viðmóti á sængurlegudeild: „Við vorum hundsuð út í eitt“

Andri og Guðrún sögðu kaldranalegt viðmót og afskiptaleysi af hálfu starfsfólks sængurlegudeildar hafa einkennt legu þeirra á deildinni. Þau hafi mætt hroka og leiðindum auk þess sem Guðrúnu hafi ekki verið sinnt á fullnægjandi hátt.

Taka málinu ekki af léttúð

Í svörum frá Landspítala vegna málsins kemur fram að lögum samkvæmt tjái spítalinn sig ekki um einstök mál. Þannig er forsvarsmönnum spítalans ekki unnt að gefa skýringar á upplifun foreldranna og ekki heldur með hvaða hætti verði brugðist við málinu.

Linda Kristmundsdóttir, framkvæmdastjóri kvenna- og barnasviðs Landspítala, staðfestir þó í samtali við Vísi að spítalinn hafi mál Andra og Guðrúnar til skoðunar. Þá ítrekar hún að Landspítali taki kvörtunum af þessu tagi ekki af léttúð.

„Við tökum alltaf svona umfjöllun alvarlega og skoðum hana, athugum hvað það er sem við hefðum getað gert betur og reynum að breyta og bæta. Það er ekki þannig að við tökum þessu léttvægt, alls ekki,“ segir Linda.

„Við viljum virkilega að fólk upplifi þjónustuna hjá okkur á jákvæðum nótum, sérstaklega á viðkvæmum tímum.“

Undirmönnun á deildinni staðreynd

Í frásögn Andra og Guðrúnar kom fram að þeim þyki hæpið að skrifa meint afskiptaleysi starfsfólks á manneklu. Andri sagði kaffistofuna nær alltaf hafa verið fulla af starfsfólki auk þess sem fáar konur hafi legið á deildinni með Guðrúnu.

Aðspurð segir Linda að töluvert hafi þó borið á undirmönnun á sængurlegudeild, líkt og á öðrum deildum spítalans. Þá stendur spítalinn frammi fyrir fjöldauppsögnum ljósmæðra sem standa nú í kjaradeilu við ríkið.

„Já, ég get staðfest að það sé undirmönnun. Okkur vantar í fjórar heilar stöður ljósmæðra á deildinni nú þegar, fyrir uppsagnir. Og við höfum verið að leysa það með yfirvinnu,“ segir Linda.

 

Sjúkraflug frá Akureyri á ekki að hafa áhrif

Þá sé almennt erfitt að segja til um ástæður þess að sjúklingum sé ekki sinnt á sængurlegudeild eða þeim jafnvel gleymt.

„Ég get eiginlega ekki sagt neitt um það vegna þess að það fer eftir aðstæðum hverju sinni. Það eru svo margar breytur sem gætu haft áhrif á það.“

Eins og áður sagði var fjölskyldan flutt með sjúkraflugi frá Akureyri á Landspítala eftir erfiða fæðingu. Linda segir að það að sjúklingar komi á spítalann annars staðar frá eigi ekki að hafa nein áhrif á umönnun þeirra.

„Nei, það á aldrei að hafa nein áhrif. Við erum náttúrulega akút spítali, við tökum við fólki einn, tveir og þrír, alls staðar þannig að það er eitthvað annað sem við þurfum að skoða.“

Að meðaltali 20 konur á hverjum tíma

Þá er ljóst að mikill fjöldi kvenna er lagður inn á deildina árlega, og oft er mjög mikið að gera. Árið 2017 var heildarfjöldi lega á sængurlegudeild 3739 og það sem af er þessu ári er fjöldinn 1553. Inni í þessum tölum eru þó dæmi um konur sem lagðar hafa verið oftar en einu sinni inn á deildina þó að slíkt sé sjaldgæft, að sögn Lindu. Þá lágu að meðaltali 20 konur inni á sængurlegudeild á hverjum tíma árið 2017.

Upplifun Andra og Guðrúnar virðist þannig heyra til undantekninga. Ekki hafa þó verið gerðar úttektir á viðhorfi sjúklinga á sængurlegudeild til þjónustunnar, að sögn Lindu, og því er erfitt að segja nokkuð til um almenna upplifun kvenna af deildinni.

„Nei, við vitum það því miður ekki en það er alveg klárlega eitthvað sem við þurfum að bæta úr og hafa reglulegri þjónustukannanir,“ segir Linda.