Dæmdur í fjögurra ára fangelsi fyrir að nauðga unnustu sinni

Héraðsdómur Reykjaness hefur dæmt Stefán Þór Guðgeirsson til fjögurra ára fangelsisvistar fyrir að nauðga unnustu sinni. Dómurinn var kveðinn upp í síðustu viku en birtur á vef dómstólsins í dag.

Var Stefán ákærður fyrir nauðgun og brot í nánu sambandi með því að hafa laugardaginn 10. desember árið 2016 ógnað heilsu og velferð unnustu sinnar á alvarlegan hátt.

Var hann sakaður um að hafa þvingað unnustuna ítrekað til samræðis, endaþarmsmaka og munnmaka víðs vegar á heimili sínu með því að beita hana ofbeldi og ólögmætri nauðung.

Í ákærunni segir að Stefán Þór hafi ekki hætt þó að konan hefði grátbeðið hann um það og meinað henni útgöngu úr húsinu.

Hlaut konan bólgu og roða á vinstri kinn og vanga og eymsli yfir kjálkalið, marbletti, rákir og húðblæðingu vinstra megin á hálsi, roða og eymsli undir kjálkabörðum, marbletti og rákir aftan á háls, mar, roða og eymsli á báðar axlir, á neðanvert bak, rass, báða handleggi og báða kálfa, samfellda dimmbláa og rauðbláa marbletti og húðblæðingar á bæði hné, roða og örsprungur aftan til í leggangaopi og roðablett og eymsli við endaþarm.

Leitaði á neyðarmóttökuna

Konan leitaði á neyðarmóttöku vegna þessa þar sem lögregla ræddi við hana. Þar lýsti hún því hvernig Stefán Þór neyddi hana til endaþarmsmaka í baðkari. Hann tók hana næst sér á axlir og bar hana niður á neðri hæð hússins þar sem hann rak höfuð hennar viljandi í vegg. Konan sagði manninn hafa hent henni í rúm sitt og haft mök við hana gegn hennar vilja. Hún sagðist hafa öskrað og grátið og beðið Stefán Þór um að hætta en hann glott og beðið hana um að gráta hærra. Hún sagði Stefán Þór hafa að lokum hætt og taldi konan hann hafa áttað sig á gjörðum sínum.

Hún sagði Stefán þá hafa haft munnmök við hana og síðan spurt hana ítrekað hvort henni fyndist hegðun hans vera nauðgun og því næst hafi hann farið að gráta. Konan sagði að henni hefð verið haldið nauðugri í húsinu frá 10 að morgni til 9 að kvöldi.

Gerði athugasemd við vinnubrögð lögreglu

Konan dró þessa frásögn til baka og lagði fram yfirlýsingu þar sem hún gerði athugasemdir við vinnubrögð lögreglu í tengslum við meinta árás Stefáns Þórs á sig. Hún sagði trúnað hafa verið brotinn gagnvart henni og hún beitt blekkingum af þeim lögreglumanni sem tók skýrslu af henni.

Hún sagðist hafa tekið fram að hún vildi ekki að málið færi lengra og taldi það óforsvaranlegt að Stefán Þór hafi verið handtekinn sömu nótt án þess að kæra kæmi frá henni.

Sagðist konan hafa verið undir áhrifum fíkniefna þegar hún var með Stefáni Þór og ekki upplifað hlutina skýrt og jafnvel séð ofsjónir.

Rakti konan þetta fyrir dómi þar sem hún sagði þau hafa stundað harkalegt kynlíf undir áhrifum fíkniefna sem brengluðu huga þeirra.

Taldi framburð um ranghugmyndir ekki sennilegan

Héraðsdómur Reykjaness taldi síðari framburð konunnar um að hún hafi verið haldin ranghugmyndum ekki sennilegan. Horfði dómurinn til upphaflegs framburðar konunnar á neyðarmóttökunni um að hún hafi verið þvinguð til samræðis og endaþarmsmaka og taldi hann réttan.

Ákvað dómurinn að sakfella Stefán Þór fyrir nauðgun en ekki taldist sannað að hann hefði svipt konuna frelsi, en dómurinn taldi að það hefði alls ekki verið vísað á bug að konan hefði ekki treyst sér til að yfirgefa heimili Stefáns Þórs.

Studdust við upptökur úr eftirlitsmyndavélum

Í dómi Héraðsdóms Reykjaness kemur fram að eftirlitsmyndavélar hefðu verið á heimili Stefáns Þórs og að upptökur úr þeim sýndu fjölmörg samskipti Stefáns og konunnar í aðalrýminu á efri hæð hússins og fram eftir degi, þar á meðal nokkur kynmök. Upptökurnar voru hljóðlausar og þóttu ekki slá föstu um hvað hefði farið á milli Stefáns Þórs og konunnar.

Á upptökunum sjást nokkrum sinnum kynmök þeirra á milli en dómurinn tók fram að þótt yfirbragð þeirra sé að Stefán Þór hefði haft frumkvæði að þeim og konan virst hafa sig töluvert minna í frammi í þeim verði ekki ráðið af upptökunum að konan hafi reynt að hindra kynmökin eða komast undan þeim á nokkurn hátt. Dómurinn tók fram að yfirbragð samskipta Stefáns Þórs og konunnar á upptökunum veitti því ekki sérstakan stuðning að konan hefði óskað sér harkalegs kynlífs og endaþarmsmaka.

Dómurinn kom inn á að konan hefði sagt á neyðarmóttökunni um kvöldið að „þetta hafi byrjað í stofunni en hann orðið geðveikt reiður og tekið hana hálstaki og haldið á henni eins og kartöflupoka niður stigann“. Héraðsdómur Reykjaness sagði upptökuna styðja eindregið frásögn konunnar um það atvik.

Sími konunnar  hleraður

Lögreglan lét hlera síma konunnar og var hlustað á samtöl konunnar við Stefán Þór og á samtöl hennar við annað fólk. Dómararnir þrír í málinu voru sammála því að ekki mætti leggja samtöl konunnar við Stefán Þór til grundvallar. Dómararnir Ingimundur Einarsson og Sandra Baldvinsdóttir voru hins vegar þeirrar skoðunar að leggja mætti samtöl konunnar við aðra fyrir en Þorsteinn Davíðsson var á móti því. Meirihluti réði því að samtöl konunnar við aðra voru látin liggja fyrir við úrlausn málsins.

Er símtal konunnar við systur hennar rakið en þar sagði konan að textinn sem saminn hafi verið fyrir hana og hún átti að skrifa undir væri afar niðurlægjandi fyrir hana og að enginn muni trúa því.

Þær áttu svo annað símtal þar sem konan segir að henni hafi verið boðin milljón fyrir „að halda kjafti“ og taldi það vel sloppið því þá fengi hún að vera í friði.

Í símtölunum konunnar við aðra lýsir hún samskiptum sínum við Stefán Þór og meðal annars að hún hefði beðið hann um að viðurkenna fyrir vinum sínum hvað hann gerði ef hún ætti að skrifa undir þessa yfirlýsingu því hún vildi ekki koma út eins og einhver „geðsjúklingur“ sem fór upp á neyðarmóttöku með þessa frásögn.

Stefán Þór hafði áður hlotið fimm ára fangelsisdóm fyrir nauðgun árið 2012.  Hann losnaði út á reynslulausn í ágúst árið 2016 en var gert að ljúka afplánun þess dóms.