Spielberg er enn að ögra sjálfum sér

The Sugarland Express, Jaws, Raiders of the Lost Ark, Close Encounters of the Third Kind, E.T., The Color Purple, Empire of the Sun, Jurassic Park, Schindler’s List, Saving Priv­ate Ryan, A.I. Artificial Intelligence, Minority Report, Lincoln, Munich, The Terminal og The Post.

Þetta eru aðeins fimmtán kvikmyndir af þeim 32 sem Steven Spielberg hefur leikstýrt á ferli sem hófst með Duel frá 1971. Mynd sem gerð var fyrir sjónvarp en reyndist svo góð að ekkert annað kom til greina en breiðtjaldið.

Sem framleiðandi hefur Spielberg einnig komið að gerð mynda á borð við Flags of Our Fathers, Who Framed Roger Rabbit, Innerspace, An American Tail, The Money Pit, Back to the Future, The Goonies, Gremlins og Poltergeist.

Tilkomumikil upptalning og samt er aðeins um brot úr afrekaskrá Spielbergs að ræða og ekki þyrfti nema að draga fram fjórar til fimm myndir úr þessum bunka til þess að staðfesta að Spielberg er óumdeildur heimsins magnaðasti kvikmyndaleikstjóri.

Úr þrjúbíó til Auschwitz

Spielberg sigraði heiminn með kristaltærri afþreyingu eins og Jaws og Raiders of the Lost Ark, fljúgandi furðuhlutadramanu Close Encounters og þeirri stórkostlegu E.T. sem heillaði heila kynslóð á níunda áratugnum og getur enn vakið barnið í hjarta hverrar manneskju sem á horfir.

En Spielberg vildi meira. Hann þráði Óskarsverðlaunin og virðingu fyrir annað og meira en fullkomna afþreyingu. Fyrsta atrenna hans að inngöngu í hátimbraðar snobbhallir var The Color Purple árið 1985.

Átakanleg og eftirminnileg mynd eftir samnefndri skáldsögu Alice Walker. Ekki dugði þetta til frekar en Empire of the Sun tveimur árum síðar. Stíflan brast með Schindler’s List 1993. Magnaðri sögu um illsku og manngæsku í helfararhörmungum seinni heimsstyrjaldarinnar. Myndin landaði sjö Óskarsverðlaunum, meðal annars fyrir bestu myndina og Spielberg fékk sína fyrstu styttu sem besti leikstjórinn.

Okkar maður var kominn á bragðið og 1998 fékk hann Óskarsverðlaunin aftur, fyrir Saving Private Ryan, ruddalega góða og raunsæja mynd um hörmungar og hetjudáðir bandarískra hermanna í kjölfar innrásar bandamanna í Normandí.

Aftur á byrjunarreit

Með Ready Player One má segja að Spielberg hverfi aftur til fortíðar en í myndinni blandast saman dystópía, nöturleg framtíðarsýn, fantasía og ævintýri baðað í nostalgíu. En þrátt fyrir alla reynsluna af fantasíunni ræðst undrabarnið, sem er löngu orðið fullorðið, síður en svo á garðinn þar sem hann er lægstur.

Myndina gerir Spielberg eftir samnefndri vísindaskáldsögu Ernest Cline frá 2011 sem fékk strax þann stimpil að ómögulegt væri að kvikmynda hana. Hún á sér stað árið 2045, í ömurlegum heimi þar sem freistandi er að flýja inn í sýndarveruleika sem nefnist OASIS. Þar getur hver verið það sem hann vill og gert hvað sem er. Ímyndunaraflið er eina hindrunin.

Spielberg segir í viðtali við kvikmyndatímaritið Empire að Ready Player One sé ein af þremur erfiðustu myndunum sem hann hefur gert. Hinar eru Jaws og Saving Private Ryan.

Jaws og Saving Private Ryan hafi reynt á hann líkamlega en með Ready Player One mætti meistarinn þeirri áskorun að „þurfa að reyna að gera eitthvað nýtt tæknilega sem hefur aldrei verið gert áður“.

Þung orð þegar þau koma frá leikstjóra sem hefur svo oft gert eitthvað sem aldrei hafði verið gert áður. „Ég þurfti að læra hvernig ætti að gera mynd eins og þessa á meðan ég var að gera mynd eins og þessa.“