Lækkuðu laun framkvæmdastjórans um 9 prósent

Stjórn Lífeyrissjóðs verslunarmanna hefur lækkað laun framkvæmdastjóra sjóðsins um níu prósent og hefur sú lækkun þegar tekið gildi. Þetta kom fram í ræðu Guðrúnar Hafsteinsdóttur, formanns stjórnar Lífeyrissjóðs verslunarmanna, á ársfundi sjóðsins sem haldinn var á Grand Hótel í gær. Sagði hún að miðað við launaþróun hefðu laun framkvæmdastjórans í raun lækkað um 20 prósent eftir að ákvörðun var tekin um að frysta þau á vormánuðum árið 2016.

Í ræðunni sagði Guðrún frá því að töluverðar umræður um launamál sjóðsins hefðu átt sér stað á síðasta aðalfundi sjóðsins og þá sérstaklega launakjör framkvæmdastjóra sjóðsins.

Var í efri mörkum miðað við önnur laun

Tók stjórnin þær ábendingar til sín og ákvað á síðasta ári að fela óháðum ráðgjöfum að meta launakjör framkvæmdastjóra sjóðsins, Guðmundar Þ. Þórhallssonar, í samanburði við aðra.

Fékk Intellecta það verkefni en það fyrirtæki gerir árlega launakönnun sem nær til um fjögur þúsund sérfræðinga, meðal annars þeirra sem starfa á fjármálamarkaði.

Var niðurstaða þeirrar könnunar að laun framkvæmdastjóra sjóðsins var í efri mörkum miðað við laun framkvæmdastjóra annarra lífeyrissjóða.

Tók stjórnin ákvörðun í framhaldinu um að lækka laun framkvæmdastjóra sjóðsins um níu prósent og sagði Guðrún í ræðu sinni að sú lækkun hefði þegar tekið gildi.

Lækkar um 307 þúsund á mánuði

Guðrún tók fram að laun framkvæmdastjórans hefðu staðið í stað síðan á vormánuðum 2016 eftir að ákvörðun hafði verið tekin um að frysta þau.

„Ef tekið er mið af launaþróun síðan 2016 til dagsins í dag og þessarar 9% launalækkunar má segja að laun framkvæmdastjóra hafi lækkað um 20%,“ sagði Guðrún.

Í frétt Ríkisútvarpsins árið 2016 kom fram að laun Guðmundar sem framkvæmdastjóra sjóðsins hefðu hækkað um 19,11 milljónir króna frá árinu 2009 til ársins 2015, eða um 104,4 prósent. Þar kom fram að árslaun Guðmundar árið 2015 hefðu verið 37,7 milljónir króna.

Samkvæmt ársskýrslu Lífeyrissjóðs verslunarmanna fyrir árið 2017 var Guðmundur með 40,9 milljónir króna í heildarárslaun árið 2017. Það eru um það bil 3,4 milljónir króna á mánuði. Lækkunin um 9 prósent er því um 307 þúsund krónur.  Árið 2016 voru heildarárslaun hans 39,6 milljónir króna samkvæmt upplýsingum úr sömu ársskýrslu.