Meirihluti fylgjandi lækkun veiðigjalda

Sé aðeins horft til þeirra sem tóku afstöðu í skoðanakönnun Gallup fyrir Fiskifrétta eru 68 prósent aðspurðra fylgjandi því að lækka veiðigjöld á lítil og meðalstór fyrirtæki í sjávarútvegi. 32 prósent eru því andvíg. Greint er frá málinu á vef Fiskifrétta.

Þar kemur fram að grunnniðurstaða könnunarinnar sé sú að 49 prósent aðspurðra séu því fylgjandi að lækka veiðigjöld á litlar og meðalstórar útgerðir; 34,4 prósent eru frekar fylgjandi því og 14,2 eru mjög fylgjandi.

Þá eru 23 prósent andvíg því að lækka veiðgjöld; 12,9 prósent eru frekar andvíg og 10,1 prósent mjög andvíg.

 

Fyrir um tveimur vikum boðaði Lilja Rafney Magnúsdóttir, formaður atvinnuveganefndar, lækkun veiðigjalda á þingfundi og sagði undirbúning að því hafin í sjávarútvegs-og landbúnaðarráðuneytinu. Sagði hún að lítil og meðalstór sjávarútvegsfyrirtæki hefðu miklar áhyggjur af veiðgjöldunum og að fyrirkomulagið eins og það er í dag leiddi til samþjöppunar í greininni.

Könnun Gallup fyrir Fiskifréttir var netkönnun, sem gerð var dagana 1. til 14. febrúar. Spurt var: Ert þú fylgjandi eða andvíg(ur) því að lækka veiðigjald hjá litlum og meðalstórum fyrirtækjum í sjávarútvegi? Var úrtakið 1.426 manns af öllu landinu, 18 ára og eldri, handahófsvaldir úr viðhorfahópi Gallup og þátttökuhlutfallið var 57,4 prósent.

Nánar má lesa um könnunina hér.