Guðmundur í undanúrslit eftir sigur á Degi

Barein vann sannfærandi sigur á Japan, 29-21, í uppgjöri íslensku þjálfaranna í Asíukeppninni í handbolta.

Staðan í hálfleik var 13-13 en í síðari hálfleik tók lið Guðmundar öll völd á vellinum og hreinlega valtaði yfir Japan.

Barein er því komið í undanúrslit í keppninni þar sem það mætir Sádi-Arabíu. Japan mun mæta Íran í leik um fimmta sætið á mótinu.

Barein er að sama skapi búið að tryggja sér farseðilinn á HM á næsta ári en þann farseðil fá öll liðin sem komust í undanúrslit keppninnar.