Máluðu merki Broncos í bæði endamörkin

Það er engu líkara en vallarstarfsmenn á Levi's vellinum viti ekki við hvaða lið Denver Broncos spili í Super Bowl eftir rúma viku.

Þeir gerðu nefnilega þau mistök að mála merki Broncos í bæði endamörk vallarins. Mistökin föttuðust eðlilega fljótt og var strax farið í að afmá Broncos-merkið úr öðru endamarkinu.

Vissulega saklaus mistök en það þýðir ekki að við megum ekki hafa gaman af þeim. Fyrir þá sem ekki vita þá mun Denver spila við Carolina Panthers í úrslitaleik NFL-deildarinnar.

Leikurinn fer fram þann 7. febrúar næstkomandi og verður í beinni útsendingu á Stöð 2 Sport.