Þrívíddarprentaður Audi

Uppáhaldsleikfang Audi um þessar mundir er ekki þessi smækkaða útfærsla Auto Union Typ C grand prix bíll frá 1936, heldur þrívíddarprentarinn sem skóp hann. Bíllinn er í hlutföllunum 1:2, en hann er ekki úr plasti eins og flestir þrívíddarprentarar prenta úr, heldur úr stáli.

Þessi prentari er fær um að prenta bæði úr stáli og áli og er stálið og álið úr fínmuldum salla þar sem hvert korn er helmingi minna en breidd mannshárs. Ástæðan fyrir því að gamli Auto Union sportbíllinn er ekki í fullri stærð er sú að prentarinn ræður ekki við svo stóran hlut í einni prentun.

Nákvæmni prentarans er ótrúleg og styrkur þeirra hluta sem hann prentar er meiri heldur en ef bíllinn hefði verið smíðaður á hefðbundinn hátt. Audi sér framtíð í því að prentarar eins og þessi geti framleitt í miklu magni flókna smíðishluti á styttri tíma en með öðrum þekktum aðferðum.

Auto Union er eitt þeirra fjögurra bílamerkja sem Audi varð til úr við sameiningu þeirra allra.