Haukur Helgi kynntur sem leikmaður Njarðvíkur á morgun

Njarðvík mun halda blaðamannafund á morgun, miðvikudag, þar sem tilkynnt verður um breytingar á leikmannahópi liðsins í Domino's-deild karla.

Gunnar Örn Örlygsson, formaður körfuknattleiksdeildar Njarðvíkur, staðfesti þetta við Vísi í dag en hann vildi ekki greina frá tilefni fundarins.

Samkvæmt heimildum Vísis hefur Njarðvík komist að samkomulagi við landsliðsmanninn Hauk Helga Pálsson um að leika með liðinu í vetur. Ekki náðist í Hauk Helga við vinnslu fréttarinnar.

Vísir spurði Gunnar hvort að það stæði einnig til að skipta um Bandaríkjamann en því neitaði hann.