Jeep Grand Cherokee fær 707 hestafla Hellcat vél

Chrysler á bæði Dodge og Jeep bílamerkin og hefur nú þegar í boði bílana Dodge Challenger og Charger með 707 hestafla Hellcat vélar. Heyrst hefur að þar ætli fyrirtækið ekki að láta staðar numið heldur vopna enn einn bílinn úr sínu röðum þessari ógnaröflugu vél.

Það sem meira er, það yrði jeppinn Jeep Cherokee og með því væri hann líklega orðinn öflugasti fjöldaframleiddi jeppi heims. Kæmi bíllinn með þessari vél fyrst af 2017 árgerð.

Þessar fréttir hafa ekki fengist staðfestar frá Jeep, en bílablaðið Motor Authority segist hafa nokkuð öruggar upplýsingar um þessi áform fyrirtækisins. Með þessari 6,2 lítra V8 Hemi vél verður Cherokee ekki nema 3 sekúndur að ná 100 km hraða og hámarkshraðinn verður 320 km/klst. Nokkuð fáheyrðar tölur fyrir jeppa.

Þá mun SRT útgáfa Jeep Grand Cherokee fá nokkur aukahestöflin frá fyrri útgáfu og verða 490 hestöfl. Það ætti svosem að duga flestum.