Eldsneytisáfylling snýr aftur í Formúlu 1

Uppkast af stefnubreytingu hefur verið samþykkt af skipulagshópi Formúlu 1 liða á fundi í gær. Meðal breytinga er að eldsneytisáfyllingar snúa aftur.

Markmið fundarins var að gera Formúlu 1 enn meira spennandi með því að auka sjónarspilið. Allt fyrir sem minnstan pening. Breytingarnar munu fyrst hafa áhrif árið 2017.

Hugsanlega verður opnað fyrir þann möguleika að minni liðin geti keypt bíla af þeim stærri. Sá kostur er að öllum líkindum ódýrari lausn en að öll liðin hanni eigin bíl með tilheyrandi kostnaði.

Stærsta fréttin af fundinum er þó sennilega sú að eldsneytisáfyllingar verða aftur heimilar í þjónusuthléum.

Margar aðrar breytingar eru á borðinu, svo sem hærri hámarkssnúningar véla, sem myndu gera bílana „á milli fimm og sex sekúndum hraðari á hring,“ samkvæmt FIA (Alþjóða akstursíþrótta sambandinu). Á fundinum voru Bernie Ecclestone og fulltrúar FIA, Ferrari, Mercedes, McLaren, Red Bull, Williams og Force India.

Nýjar loftflæðisreglur gætu orðið veruleiki ásamt breiðari dekkjum og léttari bílum allt gert til að auka sjónarspilið og hraða bílanna. Bílarnir eiga að vera árásargjarnari í útliti.

Stærstu breytingarnar bíða til ársins 2017. Ein breyting tekur þó gildi strax á næsta ári. Sú breyting snýr að dekkjagerðum.

Liðin geta þá valið hvaða dekkjagerðir þau vilja nota í hverri keppni, liðin velja þá tvær af fjórum tegundum til að mæta með í hverja keppni. Tegundirnar eru: ofur mjúk dekk, mjúk dekk, milli hörð dekk og hörð dekk.

Mýkri dekkin veita meira grip en endanst ekki eins lengi. Þessi breyting gæti því opnað á aukinn fjölbreytileika í keppnisáætlunum liða. Núverandi fyrirkomilag er þannig að Pirelli, dekkjaframleiðandinn velur þær tvær tegundir sem hann telur henta best á hverri braut.

Tillögu um að hækka heimilaðar vélar á yfirstandandi tímabili úr fjórum í fimm, var hafnað.