Formúla 1 fyrir konur

Bernie Ecclestone, eigandi Formúlu 1 mótaraðarinnar, hefur mikinn áhuga á því að efna til sérstakrar mótaraðar í Formúlu 1 þar sem eingöngu kvenfólk yrðu ökumenn.

Ecclestone telur að hvorki muni vanta áhorfendurna, auglýsingarnar eða styrktaraðilana fyrir slíka mótaröð. Ecclestone sér það fyrir sér að keppni kvenökumannanna færi fram á undan keppni karlökumannanna á sunnudögum.

Eini vandinn sem hinn 84 ára eigandi Formúlu 1 sér við þessa hugmynd sína sé fólgin í því að fá nógu marga hæfa kvenökumenn til að halda úti heilli mótaröð. Ekki er mikið um kvenfólk sem keppir í þeim hraðakstursmótaröðum sem nú er keppt í í heiminum og enginn keppandi í Formúlu 1 er kvenkyns.

Susie Wolff er 32 ára reynsluaksturmaður hjá Williams liðinu og hún hefur alla ævi keppt við karlmenn, meðal annars í Formúlu 3 keppnisröðinni. Carmen Jorda keppir fyrir Lotus í GP3 mótaröðinni og hin bandaríska Danica Patrick hefur lengi keppt í Nascar mótaröðinni vestanhafs og hún hefur margsinnis verið talin líkleg sem Formúlu 1 ökumaður.

Nokkur þekkt önnur nöfn í röðum kvenökumanna hafa verið nefnd til sögunnar sem líklegir ökumenn ef af Formúlu 1 meðal kvenna yrði, þar á meðal Rahel Frey, Sarah Fisher, Pippa Mann, Natacha Gachnang og Maria de Villota.