Lowe vill sjá öruggt fyrsta og annað sæti í Singapúr

Paddy Lowe, tæknistjóri Mercedes óskar þess af ökumönnum liðsins að þeir einbeit sér að því að tryggja liðinu fyrsta og annað sætið í Singapúr. Hann vill ekki sjá neitt drama.

Baráttan á milli Nico Rosberg og Lewis Hamilton, ökumanna liðsins hefur verið mikið til umfjöllunnar undanfarið. Ólíklegustu samsæriskenningar hafa sprottið upp af hinum ýmsustu tilefnum.

„Sem lið erum við gríðarlega ánægð með Monza. Þetta er ein skemmtilegasta en erfiðasta braut ársins, hvað þá að ná fyrsta og öðru sæti þar, virkilega ánægjulegt,“ sagði Lowe.

Samkvæmt Lowe væri enn gleðilegra ná fyrsta og öðru sæti ef hægt væri að sleppa fjölmiðlafárinu og samsæriskenningunum.

„Keppnin í Singapúr er alltaf full af hasar og atvikum, brautin liggur bara þannig og hitinn spilar inn í fjölda þeirra sem ná ekki að klára - bæði verða vélabilanir og mannleg mistök fleiri í hitanum. Við ætlum okkur að stýra framhjá öllu drama og ná aftur góðri niðurstöðu í upphafi loka þriðjungs tímabilsins,“ sagði Lowe að lokum.