Sessunautar fyrstir í mark í Þórsmörk

Örvar Steingrímsson kom, sá og sigraði í árlegu Laugavegshlaupi sem fram fór í dag. Örvar kom í mark fjórum mínútum á undan samstarfsmanni sínum hjá verkfræðistofunni Eflu.

Örvar, sem tók þátt í hlaupinu í þriðja skipti, kom í mark á rúmum fjórum klukkustundum og fjörutíu og átta mínútum. Hann hefur bætt sig á milli ára og var afar ánægður í samtali við Vísi.

„Þetta var bara algjör snilld. Það voru erfiðar aðstæður að hluta til því það var langur kafli með snjó við Hrafntinnusker," sagði Örvar sem bætti sig um fjórtán mínútur frá því í fyrra.

„Svo var smá mótvindur og rigning sem hafði reyndar ágætis áhrif á mig undir lokin. Þá var manni ekki svo heitt í lokin, þurfti ekki að drekka jafnmikið sem er gott fyrir magann," sagði Örvar.

Laugavegshlaupið er 55 kílómetrar og voru 306 keppendur skráðir til leiks í ár. Þar af voru 125 erlendir þátttakendur. Fjórum mínútum á eftir Örvari í mark var Guðni Páll Pálsson. Svo skemmtilega vill til að Guðni og Örvar starfa saman á verkfræðistofu í bænum.

„Við hlupum þetta að stærstum hluta saman. Það var ekki fyrr en átta kílómetrar voru eftir að ég gaf aðeins í og það slitnaði í sundur. Það var gott að geta spjallað við hann allan tímann."

Aðspurður hvernig skrokkurinn væri eftir hlaupið sagði Örvar:

„Hann er bara fínn. Maður er auðvitað þreyttur en annars er allt í góðu. Það var seyðingur aftan í læri seinustu kílómetrana en þetta er bara fínt."