Kristján kominn á heimsmeistaramótið í 6 rauðum

Snókerspilarinn Kristján Helgason tryggði sér í gær keppnisrétt í heimsmeistaramótinu í 6 rauðum sem fram fer í Tælandi í september á þessu ári.

Kristján tryggði sér þátttökurétt á mótinu í forkeppni áhugamanna í Evrópu í snóker en Íslendingurinn var einn af fjórum sem tryggðu sér keppnisrétt á mótinu.

Ásamt Kristjáni munu þeir Robert Murphy, John Whitty og Robin Hull taka þátt á móti frá Evrópu. Kristján er nú staddur í Póllandi að taka þátt í Evrópumóti áhugamanna í snóker og hefur aðeins tapað einum ramma það sem af er mótsins.

Kristján er því í efsta sæti mótsins þegar kemur að úrsláttarkeppninni.