Ásgeir Íslandsmeistari í loftskammbyssu

Ólympíufarinn Ásgeir Sigurgeirsson varð í dag Íslandsmeistari í keppni með loftskammbyssu en Íslandsmótið fór fram í Egilshöll í dag.

Ásgeir hlaut alls 575 stig og var langefstur. Næstur kom Thomas Viderö með 550 stig og Karl Kristinsson varð þriðji með 540 stig.

Í kvennaflokki varð Jórunn Harðardóttir úr Skotfélagi Reykjavíkur Íslandsmeistari með 370 stig, Kristína Sigurðardóttir einnig úr Skotfélagi Reykjavíkur varð önnur með 349 stig og Bára Einarsdóttir úr Skotfélagi Kópavogs varð þriðja með 347 stig.

 

A-sveit Skotfélags Reykjavíkur varð Íslandsmeistari í liðakeppni karla með Ásgeir Sigurgeirsson, Karl Kristinsson og Guðmund Kr. Gíslason innanborðs með 1,652 stig. Önnur varð B-sveit Skotfélags Reykjavíkur með 1,583 stig og A-sveit Skotfélags Kópavogs varð þriðja með 1,579 stig.

Í loftriffli karla varð Guðmundur Helgi Christensen Íslandsmeistari með 592,5 stig, Logi Benediktsson úr Skotfélagi Kópavogs varð annar með 563,9 stig og Þorsteinn B. Bjarnarson úr Skotfélagi Reykjavíkur varð þriðji með 514,2 stig.

Í loftriffli kvenna varð Íris Eva Einarsdóttir Íslandsmeistari með 388,5 stig og Jórunn Harðardóttir önnur með 387,2 stig. Þær eru báðar úr Skotfélagi Reykjavíkur.

Oddur E. Arnbergsson varð Íslandsmeistari unglinga með 493 stig.