Næringar­fræðingur segir próteinbita dul­búið sæl­gæti

„Það eitt að bæta próteini við vöru gerir hana ekki að hollustuvöru," segir næringarfræðingurinn Steinar B. Aðalbjörnsson, en hann gagnrýnir markaðssetningu Aktív próteinbita og segir hana brjóta gegn reglugerðum.

„Þetta ber keim af orkuríku og sykurmiklu sælgæti. Viðbótarpróteinið gerir vöruna vissulega næringarríkari, en þegar sykurinn er svona mikill er erfitt að réttlæta þetta sem einhverja heilsuvöru."

Próteinbitarnir, sem framleiddir eru af Nóa Síríus, eru „handhæg næringarlausn" og „afbragðs kostur til að seðja hungrið á heilbrigðan og gómsætan hátt" samkvæmt upplýsingum á vefsíðu Aktív og umbúðum bitanna. Enn fremur eru þeir sagðir geta haft „hjartverndandi áhrif".

Þessu vísar Steinar á bug og segir að um sé að ræða klárt brot á reglum um merkingu matvæla. „Í reglugerðum um auglýsingu og merkingu matvæla er tekið skýrt fram að ekki megi villa fólki sýn á vörur, er varðar innihald, útlit eða markaðssetningu. Þessi vara er markaðssett sem „góð og holl lausn" fyrir fólk, en hún getur einfaldlega aldrei talist holl."

Jafnmikill sykur og í Mars-súkkulaði

Á vefsíðu Steinars ber hann saman næringargildi Aktív bitanna við nokkrar tegundir sælgætis, og þar kemur meðal annars í ljós að Aktív inniheldur jafnmikinn sykur og Mars-súkkulaði, eða 38 grömm af hundrað.

„Það er svo lítill munur þarna á milli að það er ekki hægt að kalla annað heilsuvöru og hitt sælgæti. Við erum að reyna að ná tökum á sykurneyslu landans vegna þess að hann er ein af helstu ástæðum þess að við erum ekki í betri holdafarsmálum en raunin er."

Steinar segist óska þess að fyrirtæki hætti að ljúga að neytendum þegar kemur að hollustu matvæla. Neytendur séu ekki heimskir, og óvönduð og villandi markaðssetning geri ekki annað en að láta fólk hætta að kaupa vöruna.

Reglugerð nr. 503/2005 um merkingu matvæla, 5. gr.

Merking skal ekki vera blekkjandi fyrir kaupanda eða móttakanda, einkum að því er varðar sérkenni matvælanna, nánar tiltekið eðli þeirra, auðkenni, eiginleika, tegund, samsetningu, þyngd, geymsluþol, uppruna, aðferð við gerð eða framleiðslu. Óheimilt er að:

1. eigna matvælum áhrif eða eiginleika sem þau hafa ekki,

2. gefa í skyn að matvæli hafi tiltekin sérkenni, ef öll sambærileg matvæli hafa í raun þessi sérkenni,

3. eigna matvælum þá eiginleika að fyrirbyggja eða vinna á sjúkdómum manna, hafa lækningarmátt eða að vísa til þess háttar eiginleika.

Bönn og takmarkanir, sem um getur í 2. og 3. mgr. gilda einnig um kynningu matvæla, einkum hvað varðar lögun, útlit eða umbúðir, umbúðaefni sem notuð eru, hvernig þeim er komið fyrir og við hvaða aðstæður þau eru höfð til sýnis*, svo og auglýsingar.

__________

Uppfært kl. 15:42 - Athugasemd frá Nóa Síríus varðandi sykurinnihald í Aktív próteinbitum

Aktív er nýr valkostur á markaði fyrir þá sem vilja auka próteinneyslu sína, en Aktív inniheldur hágæða mysuprótein. Í einum Aktív bita eru tæp 2 gr sykurs en magn sykurs í heilum Aktív poka er 38gr. Sem er á mjög svipuðu róli og sykurinnihald í hliðstæðum vörum hér á landi, þar með talið vinsælum próteinstykkjum sem margir þekkja. Í erlendum próteinstykkjum sem seld eru hér á landi má einnig finna sykur. Próteinvörur sem þessar höfða aðallega til fólks sem stundar hreyfingu (þ.e.a.s. fólk sem er aktívt), en sem jafnframt kýs að leyfa sér einstaka góðgæti við og við.

Þrátt fyrir að sumir kjósi af ýmsum ástæðum að forðast vörur sem innihalda sykur, þá hafa viðtökur neytenda við Aktív almennt verið mjög góðar. Þykir okkur það benda til að rúm hafi verið fyrir vöru eins og þessa, í bland við aðrar vinsælar vörur af þessu tagi, sem í boði eru á markaðnum. Við erum þakklát fyrir áhuga neytenda á þessari vöru og höfum fengið góðar ábendingar sem við munum ábyggilega nýta okkur í framtíðinni til þess að bæta vöruna.

Reglugerðin sem er vísað í í fréttinni er úreld. Ný og enn strangari reglugerð sem við förum eftir er „Upplýsingar um matvæli til neytenda - ný merkingarreglugerð ESB nr. 1169/2011."



Með kveðju, Nói Síríus