Alonso hefur aldrei verið í betra formi

Það er Fernando Alonso sem hefur stolið senunni í Formúlu 1 í ár. Hann hefur unnið þrjá kappakstra á tímabilinu og leiðir heimsmeistarakeppnina með 34 stigum. Mark Webber er honum næstur með 120 stig og Sebastian Vettel þriðji með 110.

En það bjuggust fáir við því að Alonso á Ferrari bílnum yrði efstur þegar tímabilið er hálfnað. Það þótti í raun fjarstæðukennt í upphafi tímabils því tæknistjóri liðsins lýsti því sjálfur yfir að bíllinn væri handónýtur. Gríðarlega hörð barátta um efstu sætin hefur hins vegar skilað Alonso langt.

Vélvirki Alonso sagði við Autosport vefsíðuna á dögunum að kappinn hefði aldrei verið í betra formi. „Það mætti telja þá ökumenn á fingrum annarrar handar sem hafa haft jafn mikla eða meiri hæfileika í sögu Formúlu 1," sagði Andrea Stella.

Það verður því að teljast líklegt að Alonso sigri kappaksturinn í Ungverjalandi um helgina enda hefur hann spilað hverju trompinu á fætur öðru á hárréttum augnablikum. Því má hins vegar ekki gleyma að McLaren hefur verið mjög sterkt á brautinni í Ungverjalandi og Lotus-bíllinn gæti vel náð góðum árangri þar.

Hungaroring-brautin í Ungverjalandi hýsir elleftu umferð heimsmeistaramótsins í Formúlu 1 um helgina. Brautin ef hæg, snúin og lítill tími fyrir ökumenn til að anda milli beygja. Sumir hafa jafnvel gengið svo langt að líkja henni við brautina í Mónakó án vegriðanna.

Fyrsta beygja brautarinnar er kröpp U-beygja eftir lengsta beina kafla brautarinnar. Þá taka við tvær snúnar beygjur þett við hvor aðra. Miðkafli brautarinnar er örugglega sá snúnasti og getur sent bílana snögglega í vegriðið ef ökumenn eru ekki með hugann við efnið. Beygi ökumaður sekúndubroti of seint inn í beygju riðlast allar hinar og hringurinn er ónýtur.

DRS svæði: Á ráskaflanum.



Dekkjagerðir í boði: Mjúk (option) og miðlungs (prime)

Efstu þrír árið 2011:

1. Jenson Button - McLaren

2. Sebastian Vettel – Red Bull

3. Fernando Alonso – Ferrari





Allt mótið er í beinni útsendingu á Stöð 2 Sport.

Fimmtudagur:

8:00 Æfing 1

13:00 Æfing 2

Laugardagur:

8:55 Æfing 3

11:50 Tímataka

Sunnudagur:

11:40 Ungverski kappaksturinn

Staðan í titilbaráttunni eftir 10 umferðir

Ökumenn

1. Fernando Alonso - 154 stig

2. Mark Webber - 130

3. Sebastian Vettel - 110

4. Kimi Raikkönen - 98

5. Lewis Hamilton - 92

6. Nico Rosbert - 76

7. Jenson Button - 68

8. Romain Grosjean - 61

9. Sergio Perez - 47

10. Kamui Kobayashi - 33

Bílasmiðir

1. Red Bull - 230 stig

2. Ferrari - 177

3. McLaren - 160

4. Lotus - 159

5. Mercedes - 105