Ekkert bendir til þess að gosið sé í rénun

Íbúafundir verða haldnir í dag á Goðalandi í Fljótshlíð kl. 14.00, í grunnskólanum á Hellu kl. 17.00 og í félagsheimilinu Hvoli á Hvolsvelli kl. 20.00. Þetta kemur fram í tilkynningu frá almannavörnum.

Upplýsingafundir sérfræðinga voru haldnir í upplýsingamiðstöðvunum í Skógarhlíð og í Hvoli á Hvolsvelli í morgun. Páll Einarsson og Sigurður R. Gíslason, frá Jarðvísindastofnun HÍ, og Guðrún Nína Petersen frá Veðurstofu Íslands voru á fundinum í Skógarhlíð. Ármann Höskuldsson og Martin Hensch, frá Jarðvísindastofnun HÍ, voru á fundinum á Hvoli.

Á fundinum í Skógarhlíð kom fram að engin merki eru um að gosið sé í rénun, en öskumyndun er töluvert minni en verið hefur. Samsetning öskunnar er óbreytt en flúorinnihald hennar hefur aukist talsvert (800 mg/kg). Ekkert bendir þó enn til þess að forða þurfi skepnum í hús strax. Fylgst verður grannt áfram með flúorinnihaldinu.

Gosstrókurinn er mjög lágur og mælist ekki á ratsjá. Ekki er gert ráð fyrir að aska nái upp að 20.000 fetum (6 - 7 km) á næstu dögum. Öskufall verður áfram suður og suðaustur af jöklinum í dag en vindátt snýst svo í NA og mun öskufallið færast í suðvestur í kvöld. Spáð er hægum vindi. Það, ásamt lítilli öskumyndun, gerir að verkum að askan mun ekki falla langt frá gosstöðvunum. Engar líkur eru á öskufalli suðvestanlands.

Veðurstofan spáir því að öskufallið verði mjög nálægt gosstöðvunum næstu fjóra daga.