Brjálað Eurovision-myndband í Litháen

Rúmlega 700 manns tóku þátt í gerð Eurovision-myndbands í Vilnius í Litháen í gær. Það voru norskir sjónvarpsmenn sem söfnuðu lýðnum saman en þeir fara nú á milli Evrópulanda og taka upp efni fyrir atriði sem sýna á í hléinu á Eurovision-keppninni. Þeir hafa nú þegar heimsótt Reykjavík.

Norska sjónvarpið er búið að gera kennslumyndbönd og setja þau á Youtube. Þar er farið yfir ákveðinn dans sem almenningur í borgum Evrópu á að dansa í massavís. Síðan verður þetta væntanlega klippt saman.

Fyrirbærið er innblásið af svokölluðu flash mob-æði sem skaut upp kollinum fyrir nokkrum árum síðan. Þar sem fjöldi fólks hefur samband, oft í gegnum Netið, hittist síðan á ákveðnum stað á ákveðinni stund og ýmist dansar sama dans, stendur kyrrt eða þvíumlíkt.

Norðmenn vilja með þessu sýna fram á að þær 135 milljónir manna sem horfa á Eurovision eru líkar að mörgu leyti. Þetta er allt hluti af stóru þema keppninnar en þegar Norðmenn sýndu hvernig undirbúningi miðaði í desember síðastliðnum sögðu fulltrúar Eurovision að aldrei hefði nokkuð land mætt svo vel undirbúið til leiks.

Myndbandið frá Vilnius má sjá hér.