Við erum í úrslitakeppni og þar er spilað fast

Deildarmeistarar Keflavíkur tryggðu sér fjórða leikinn í undanúrslitaeinvígi sínu við ÍR með 33 stiga stórsigri á föstudagskvöldið.

Jón Norðdal Hafsteinsson átti stórleik í þriðja leiknum og skoraði 18 stig og hitti úr öllum 7 skotunum sínum en hann var „bara“ með samtals 7 stig og 33 prósenta skotnýtingu í fyrstu tveimur leikjunum sem töpust.

„Sigurður þjálfari gerði smá taktískar breytingar á liðinu til þess að vekja okkur aðeins og setti mig og Tommy á bekkinn. Það kom ekkert annað til greina en að standa sig. Ég var búinn að eiga tvo slaka leiki í röð og þarna var ekkert annað tækifæri, enginn morgundagur, það var bara að vinna eða að það yrði ekkert meira,“ segir Jón Norðdal.

Jón segir ekkert til í þeim sögusögnum að mórallinn í liðinu sé ekki góður. „Það er eitthvað búið að vera að skrifa um móralinn hjá okkur en það er alveg frábær mórall í liðinu, innan sem utan vallar. Við strákarnir erum búnir að spila lengi saman og þekkjumst vel,“ segir Jón. „Þeir voru að koma úr hörku rimmu við KR með bullandi sjálfstraust og það verður ekki af þeim tekið að þeir eru búnir að spila mjög vel. Við byrjuðum illa en komum nú til baka og vonandi gefur þessi þriðji leikur okkur aukakraft í framhaldið,“ segir Jón.

Keflavík þarf að breyta sögunni til þess að komast áfram því engu karlaliði hefur tekist að vinna einvígi eftir að hafa lent 0-2 undir. „Það er alltaf gaman að fá að taka þátt í því að breyta einhverju og við lítum á það sem nýtt ögrandi verkefni að verða fyrsta liðið til þess að koma til baka,“ segir Jón, sem segir mestan mun á liðinu hafa verið í vörninni.

„Við vorum ekki nógu fastir fyrir í fyrstu leikjunum og ætluðum bara að herða okkur. Það er verið að tala um að við séum að spila gróft, við spilum fast og það er mikill munur á því að vera fastur fyrir eða að spila gróft. Það er bara þannig að við erum komnir í úrslitakeppni og þar er spilað fast,“ segir Jón, sem býst við alvöru leik í Hellinum klukkan 17 í dag. „Þetta verður hörkuleikur, þeir koma örugglega snarvitlausir til leiks en það gerum við líka.“