Sænskar geimferðir?

Breska geimferðafyrirtækið Virgin Galactic, sem er í eigu auðkýfingsins Richards Branson, náði á föstudag í síðustu viku samkomulagi við sænska fyrirtækið Spaceport að það kanni möguleikann á því að koma mönnuðum geimförum á loft frá Norður-Svíþjóð.

Gerð líkans af geimflauginni var lokið í sumar og gerir Branson ráð fyrir því að fyrstu geimförin fari á loft á næsta eða þarnæsta ári frá Mojave-eyðimörkinni í Bandaríkjunum. Þá stefnir fyrirtækið sömuleiðis að því að reisa geimflugstöð í Nýju-Mexíkó á næstu árum.

Spaceport mun á næstu tveimur árum skoða aðstæður í Svíþjóð en helst er horft til þess að taka á loft frá Kiruna-flugvelli í Lapplandi. Gangi allt að óskum mun fyrsta geimfarið fara á loft árið 2011 eða 2012.

Munurinn á þeim sem fara út í geim í vélum frá Virgin Galactic og þeim sem farið hafa öllu hefðbundnari geimferðir er sá að þeir sem fara með fyrrnefnda félaginu, sem er einkafyrirtæki, greiða sérstaklega fyrir ferðina líkt og í venjubundnu farþegaflugi.

Að sögn Susan Newsam, talsmanns Virgin Galactic, er Svíþjóð ákjósanlegasti staðurinn í Evrópu til að skjóta upp geimförum sem þeim sem fyrirtækið hefur yfir að ráða. Ætlunin sé meðal annars að fljúga inn í norðurljósin og virða fyrir sér ljósadýrðina því enginn hafi áður prófað slíkt, að hennar sögn.

Ferðin frá Kiruna-velli til norðurljósanna kostar sem svarar um 14 milljónum íslenskra króna. Um 200 manns hafa þegar greitt inn á ferðina, sem stendur í um tvær klukkustundir, að sögn Newsam.

Virgin Galactic stefnir að því að fara með 500 farþega í tveggja klukkustunda langar ferðir út fyrir gufuhvolf jarðar fyrsta árið. Það er álíka mikill fjöldi og hefur farið út í geim á vegum opinberra geimvísindastofnana víða um heim á síðastliðnum 45 árum.