Ætlar að vinna báða leikina gegn Chelsea

Jose Mourinho skartar nýrri klippingu þessa dagana og segir sá portúgalski að krúnuraksturinn tákni það að hann sé tilbúinn í stríðið sem enska úrvalsdeildin verður í vetur. Kollegi hans Sir Alex Ferguson er á sama hátt tilbúinn í slaginn og ætlar að vinna báða deildarleikina við þá bláu.

"Við setjum stefnuna að sjálfssögðu á að vinna báða leikina gegn Chelsea, því með því eigum við bestu möguleikana á því að vinna deildina," sagði Ferguson. Manchester United og Chelsea mætast á Old Trafford sunnudaginn 26 nóvember, en það verður einmitt nokkrum dögum eftir 20 ára starfsafmæli Ferguson hjá United.

Þó Skotinn sé vissulega bjartsýnn fyrir leikina í vetur, státar hann ekki af mjög glæsilegum árangri gegn Jose Mourinho, því United hefur aðeins unnið einn af átta leikjum sínum við Englandsmeistarana síðan Mourinho tók við - á meðan Chelsea hefur fagnað sigri fimm sinnum.