Hefur engar áhyggjur af gömlu mönnunum

Raymond Domenech hefur orðið fyrir talsverðri gagnrýni fyrir að velja fremur gamla leikmenn í flestar stöður í franska landsliðið, en hann hefur nú varið þá ákvörðun sína og segir þá alla klára í slaginn þegar kemur að úrslitaleiknum á sunnudag.

"Vissulega erum menn útkeyrðir eftir leik í undanúrslitum HM, en allir leikmenn eru búnir á því eftir slíkan leik - alveg sama hversu gamlir þeir eru. Þeir halda sínum undirbúningi í lagi og vita hvað þeir eru að gera. Í mínum huga er það trúin sem spilar þarna stóra rullu. Það er kannski erfitt að vera með félagslið skipað leikmönnum á þessum aldri, en í svona stórmóti þar sem spilaðir eru sjö leikir á mánuði - er það ekkert vandamál," sagði Domenech.