Ákveður sig eftir HM

Hinn magnaði framherji Dirk Kuyt gaf það út í dag að hann tæki ákvörðun um framtíð sína ekki fyrr en eftir HM í sumar. Kuyt er mjög eftirsóttur af liðum í ensku úrvalsdeildinni, en hann segist feginn því að vera kominn úr sviðsljósinu og í æfingabúðir hollenska landsliðsins.

"Það hefur verið frekar mikill þrýstingur á mig alla leiktíðina og ég er ekki frá því að endalausar vangaveltur um framtíð mína hafi haft neikvæð áhrif á frammistöðu mína í vetur. Það er því ákveðinn léttir fyrir mig að koma í æfingabúðirnar hjá landsliðinu þar sem ég fell inn í fjöldann og get andað léttar. Ég hef sent öllum skýr skilaboð - ég ræði framtíð mína ekkert fyrr en eftir HM. Núna verður athygli mín öll á þeim appelsínugulu," sagði Kuyt og átti þar við landslið sitt.