Ég er ekki á leið frá Chelsea

Hollenski vængmaðurinn Arjen Robben hjá Chelsea segist ekki vera á leið frá Chelsea í sumar, en vangaveltur þess efnis hafa verið á kreiki í breskum fjölmiðlum undanfarna daga. Robben segist þvert á móti hafa mikið að sanna á næsta tímabili eftir erfiða leiktíð í ár.

"Ég hefði sannarlega vilja náð mér betur á strik og spila stærra hlutverk í liðinu í vetur, því í fyrra gat ég haft mikil áhrif á gang leiksins hjá okkur en það hef ég ekki gert í vetur," sagði Robben, sem hefur ekki náð sér almennilega á flug eftir erfið meiðsli. "Ég get líka fullvissað alla um að fréttir af því að ég sé að fara frá Chelsea eru þvættingur og eiga sér enga stoð í raunveruleikanum," sagði hinn 22 ára leikmaður.