Kominn í úrslit Kooyong-mótsins

Bandaríkjamaðurinn Andy Roddick komst í gær í úrslit á opna Kooyong-mótinu í tennis sem fram fer í Melbourne í Ástralíu.

Roddick lék gegn Þjóðverjanum Nicolas Kiefer í undanúrslitum og er óhætt að segja að hann hafi ekki þurft að hafa mikið fyrir sigrinum þar sem sá þýski þurfti að hætta vegna meiðsla eftir að viðureignin hafði staðið yfir í fjórar mínútur. Kiefer snéri sig illa á ökkla og gat ekkert beitt sér.

Roddick mætir öðrum Þjóðverja, Tommy Haas, í úrslitum mótsins.