Félagsmenn eignast séreignasjóð

Á aðalfundi Verzlunarmannafélgs Reykjavíkur mun stjórn félagsins leggja til að hver félagsmaður eignist séreignarsjóð hjá félaginu. "Með þessu erum við í raun og veru að setja allar hliðarþjónustur félagsins í einn sjóð. Sjötíu prósent iðgjalda rennur áfram til samtryggingar félagsins og fer í sjúkra- og slysadagpeninga, dagpeninga fyrir langveik börn, dánarbætur, lögfræðiaðstoð og svo framvegis," segir Gunnar Páll Pálsson, formaður Verzlunarmannafélagsins. "Þetta er útvíkkun á styrkjafyrirkomulagi okkar. Hver og einn félagsmaður ræður í hvað peningarnir úr sjóðnum fara, til dæmis orlof, símenntun, ný gleraugu eða heilsubrest. Við munum hækka verð í orlofshús okkar og fólk getur þá valið hvort það leitar til okkar eða einhverrar ferðaþjónustu. Við setjum aukna fjármuni í þessa varasjóði og fyrir þá sem lítið hafa notað sér styrkjafyrirkomulagið til þessa er þetta mikil breyting þeim í hag," segir Gunnar. Varasjóðafyrirkomulagið verður tekið í gagnið um næstu áramót, verði það samþykkt. Hver félagsmaður fær þá að meðaltali 45 þúsund í sinn varasjóð til að byrja með og síðan vissa upphæð árlega eftir launum viðkomandi en gert er ráð fyrir að 350 til 400 milljónir renni í varasjóði félagsmanna árlega.