Árni Ágúst grát­lega ná­lægt því að bæta met

Járni, eins og Árni Ágúst kallar sig, lenti óvænt 2-0 undir á móti Friðriki Jakobssyni í fyrstu umferð. Þrátt fyrir það náði hann að snúa taflinu við og endaði á að vinna Friðrik með 14 og 15 pílna leikjum. Árni Ágúst náði þrisvar að skora 180, sem er það hæsta sem maður getur náð, og var með eitt 127 útskot. 

Árni sigraði síðan Vitor Charrua örugglega 4-0. og var hársbreidd frá því að bæta hæsta meðaltal úrvalsdeildarinnar af Halla Egils. Það var síðan Halli Egils sem laut í lægra haldi fyrir besta spilara kvöldsins en Árni sigraði Halla 4-1 með 127 útskoti og 12 og 13 pílna leikjum. Árni endaði kvöldið með 85,34 að meðtaltali úr leikjunum þremur. Aðspurður eftir úrslitaleikinn sagði Halli Egils að þrátt fyrir að hata að tapa þá væri ekkert sem hann gat gert við spilamennsku Árna og að sigur hans á fyrsta kvöldinu væri verðskuldaður.

Spennandi viðureignir allt kvöldið

Kvöldið byrjaði á spennuþrungnum leik á milli Harðar Guðjónssonar og Halla Egils en hvorugur spilarinn átti sinn besta leik. Eftir að Hörður misnotaði níu pílur til að jafna í 2-2 náði Halli að klára leikinn og komast í undanúrslit.

Vitor Charrua sigraði Kára Vagn Birkisson í öðrum leik kvöldsins. Kári komst yfir 1-0 en reynsla Vitors kom honum í gegnum leikinn og sigraði hann að lokum 4-1 með 14 pílna leik. Kári Vagn náði ekki að sýna sínar bestu hliðar en hann á mikið inni.

Það voru síðan Arngrímur Anton Ólafsson (Toni) og Axel James Wright sem áttust við í þriðju viðureigninni sem bauð upp á mikla skemmtun. Tveir frábærir pílukastarar áttust við þar sem tilþrif kvöldsins komu en Toni kláraði hæsta útskot kvöldsins, 164 með útskot í bullinu.

Árni var spurður eftir keppnina hvort hann væri að hefna sín á Halla eftir að hafa tapað fyrir honum í Grindavík í fyrra. Þar setti Halli hæsta meðaltalið í deildinni en Árni sagði að ef spilað væri upp í þrjá leggi þá hefði hann unnið.

Kvöld 2 verður haldið laugardaginn 31. október á Hótel selfoss og allt verður í beinni á SÝN Sport.