„Við höfum ó­bilandi trú á okkur sjálfum “

„Við náðum þarna fjögurra til fimm marka forystu sem við héldum og vorum skynsamar. Þetta HK-lið er hörku lið. Þær spila hörku vörn, eru líkamlega sterkar, í góðu standi og eru bara erfiðar við að eiga. Mér fannst lítið skilja á milli, við náum forystu og náum að halda henni nokkuð vel. Smá skjálfti í lokinn, en við sigldum þessu heim,“ sagði Sólveig Lára.

Þegar u.þ.b. mínúta var eftir af leiknum var aðeins eins marks munur á liðunum og ÍR í sókn. Lauk þeirri sókn með því að Sólveig Lára fór inn úr hægra horninu og vippaði yfir Elísabetu Millý Elíasardóttur og gerði í raun út um endurkomu hjá HK í leiknum með markinu. Skoraði Sólveig Lára fjögur mörk í leiknum úr sex skotum, en þrjú af mörkunum voru vippur yfir markverði HK, sem þykir nokkuð snyrtileg afgreiðsla í handbolta.

„Mér leið vel í dag og alltaf gott að setja fyrsta inn og þá fer ákveðinn skjálfti úr manni. Bara gott að sjá hann inni. Þær eru ekkert ofboðslega ánægðar markmennirnir með þrjár vippur, en svona er þetta bara.“

Sólveig Lára er nú að leika sinn annað tímabil með ÍR eftir að hafa verið þjálfari liðsins þar á undan. Er hún aldursforseti liðsins og sennilega í allri Olís-deildinni, en er hún 40 ára. Sólveig Lára segir enga ástæðu fyrir sig að fara segja það gott í handboltanum.

„Þetta er ógeðslega skemmtilegt og ógeðslega gaman að vera með þessum stelpum og á meðan ég get þetta þá af hverju ekki. Ég er klárlega í standi og get þetta og þetta er skemmtilegra en að fara á hlaupabretti í ræktinni. Þetta er bara gaman,“ segir Sólveig Lára sem á 63 landsleiki að baki.

Aðspurð út í markmið ÍR á þessu tímabili, hefur Sólveig Lára þetta að segja.

„Við höfum óbilandi trú á okkur sjálfum og við erum með meiri trú en fólk í kringum okkur virðist hafa, eins og í handbolta hreyfingunni. Fyrsta markmið er bara efri hlutinn og svo eigum við okkur allskonar draumamarkmið sem okkur langar að ná.“