Allt undir einu þaki í hjarta Hafnar­fjarðar

Fyrir Hafnfirðinga þýðir þetta fyrst og fremst aukin þægindi enda hægt að sinna ótrúlega mörgum erindum á einum og sama staðnum.

„Ég held að verslanirnar og þjónustuaðilarnir séu í kringum tuttugu í dag og hér er í raun ótrúlega fjölbreytt úrval verslana og þjónustu að finna,“ segir Guðrún María Guðmundsdóttir, markaðs- og verkefnastjóri Fjarðar.

Hér má sjá brot af úrvali verslana í Firði. Ýtið á hvítu örina til að sjá fleiri myndir.

Hún segir breytingarnar á Firði hafa verið miklar og framkvæmdirnar umfangsmiklar. „Auk fjölgunar verslana og þjónustuaðila hafa nýjar íbúðir verið teknar í notkun á efri hæðum nýbyggingarinnar ásamt hóteli. Flutningur Bókasafns Hafnarfjarðar í Fjörð var svo einn af síðustu stóru áföngunum í framkvæmdunum.“

Hafnfirðingar vilja versla í heimabyggð

Guðrún María segir Hafnfirðinga almennt duglega að nýta þá verslun og þjónustu sem í boði er í heimabænum. Með auknu úrvali í Firði hafi það orðið enn auðveldara.

Hér er í raun ótrúlega fjölbreytt úrval verslana og þjónustu að finna.

„Hafnfirðingar eru svolítið sérstakir að þessu leyti,“ segir Guðrún. „Þeir vilja gjarnan sækja verslun og þjónustu innan bæjarins. Ég finn það bara sjálf eftir að ég flutti hingað. Ég reyni að gera allt sem ég get í Hafnarfirði og ef ég þarf að fara til Reykjavíkur eða Kópavogs er ég yfirleitt búin að safna saman á lista mörgum erindum.“

Í Firði má sinna ýmsum hversdagslegum erindum án þess að þurfa að fara langt. Þar eru verslanir, veitingastaðir, heilsugæsla, apótek og ýmis önnur þjónusta auk póstboxa frá öllum þremur helstu póstdreifingaraðilunum. Með tilkomu bókasafnsins hefur enn ein mikilvæg þjónusta bæst við flóruna.

Bókasafnið strax fullt af lífi

Nýtt Bókasafn Hafnarfjarðar opnaði á annarri hæð Fjarðar í byrjun ágúst og verður formleg opnunarhátíð haldin fimmtudaginn 13. ágúst milli klukkan 16 og 18. Guðrún María segir viðtökurnar hafa farið fram úr björtustu vonum.

„Það hefur eiginlega verið fullt hús síðan safnið opnaði. Maður er stöðugt að ganga fram hjá fólki á leiðinni þangað og það er sérstaklega gaman að sjá krakkana sem voru búin að bíða spennt eftir nýja bókasafninu. Viðtökurnar hafa verið alveg frábærar.“

Nýja safnið er mun aðgengilegra en eldra húsnæðið, sem var á fjórum hæðum og sjö pöllum. Þar má m.a. finna glæsileg barnadeild, listasmiðju og fjölnota sal sem nýta má fyrir tónleika, upplestur og fjölbreytta viðburði. „Barnadeildin er sjúklega flott. Maður óskar sér nánast að vera barn aftur þegar maður sér hana,“ segir Guðrún María.

Nýja bókasafnið snýst ekki bara um nýtt húsnæði heldur líka um nýjan kafla í menningarlífi bæjarins.

Hún bendir á að bókasöfn séu löngu hætt að vera eingöngu staðir þar sem fólk kemur til að fá lánaðar bækur. Þau gegni sífellt stærra hlutverki sem lifandi menningar- og samkomustaðir.

„Nýja bókasafnið snýst ekki bara um nýtt húsnæði heldur líka um nýjan kafla í menningarlífi bæjarins. Það er ótrúlega gaman að sjá hvað það er strax orðið vinsælt og hvað það færir mikið líf inn í húsið.“

Hluti af hjarta Hafnarfjarðar

Verslunarmiðstöðin Fjörður er staðsett í hjarta Hafnarfjarðar og telur Guðrún María að uppbyggingin styrki enn frekar þann líflega miðbæ sem fyrir er. Í næsta nágrenni eru t.d. Strandgatan með fjölbreyttu úrvali smærri verslana, Bæjarbíó og Thorsplan við Fjörð, þar sem ýmsir viðburðir eru haldnir allt árið um kring. Þar er einnig fjölbreytt veitinga- og menningarlíf og á aðventunni breytist svæðið í jólaþorpið sem flestir landsmenn þekkja.

„Við tölum stundum um miðbæ Hafnarfjarðar sem hinn miðbæinn á höfuðborgarsvæðinu. Strandgatan er svolítið eins og okkar Laugavegur og hér er mikið líf allt í kring. Fjörður er hluti af þessu hjarta Hafnarfjarðar.“

Með nýjum íbúðum, aukinni verslun og þjónustu og bókasafni sem þegar er orðið vinsæll áfangastaður hefur Fjörður þannig þróast frá því að vera hefðbundin verslunarmiðstöð yfir í fjölbreyttan áfangastað þar sem daglegt líf bæjarbúa mætist á einum stað.

„Það er eiginlega það skemmtilega við Fjörð í dag. Hér er svo margt undir einu þaki og fólk getur komið hingað og sinnt ótrúlega mörgu í einni ferð. Það er einfaldlega gott að búa í Hafnarfirði.“