Kristín setti heims­met og vann brons á HM: „Stolt af sjálfri mér“

Kristín er ríkjandi Evrópumeistari og keppti í -84 kílóa flokknum. Hún átti einn sinn allra besta dag á ferlinum og lét ekki aldurinn trufla sig þar en Kristín er 42 ára gömul.

Kristín leyfði fylgjendum sínum að fá smá innsýn í hvernig keppnin gekk frá sjónarhóli hennar sjálfrar.

Brött eftir daginn

„Ég er bara brött eftir daginn og er ánægð með hvernig til tókst í gær. Ég er sátt með árangurinn minn og bara stolt af sjálfri mér,“ sagði Kristín á samfélagsmiðlum sínum.

„Ég ætlaði mér aðeins meira í hnébeygjunni því beygjuæfingar hafa gengið svo vel að mér fannst vera rými fyrir bætingu þar,“ sagði Kristín en það var smá vesen í byrjun.

„Í fyrstu lyftu í beygjunni þá var hérna rekkahæðin mín röng og það tók smá tíma að breyta því. Ég var að reyna að koma því til skila að þetta væri rangt og ég hélt ég væri að falla á tíma meðan þeir voru að laga rekkahæðina, því við fáum bara eina mínútu á pallinum,“ sagði Kristín.

Var í örlitlu uppnámi

„Ég heyrði ekki tilkynninguna um að þeir hefðu endurstillt klukkuna þannig að ég fékk aftur mínútuna. Þannig að ég hélt, eins og ég segi, að ég væri að falla á tíma og fór svolítið óstöðug inn í lyftuna af því að ég var að flýta mér og hún var svolítið þung og ég var í svona örlitlu uppnámi,“ sagði Kristín

„Það var því miður aðeins tónninn áfram í beygjunni, að ég væri svona lengi að ná mér niður eftir þetta uppnám, lét þetta aðeins slá mig út af laginu. Við tókum þarna minna stökk frá annarri upp í þriðju beygju en síðasta beygjan varð síðan eiginlega besta beygjan. Hún var eiginlega bara léttasta beygjan, fannst mér, þannig að það var aðeins meira inni þar,“ sagði Kristín.

Í þriðju hnébeygjunni negldi Kristín 225 kílóa lyftu örugglega en sú lyfta tryggði henni brons í hnébeygju. Hún lyfti svo mest 120 kílóum í bekkpressu og fór síðan upp með 230 kíló í lokalyftunni í réttstöðulyftu. Sú lyfta var nýtt heimsmet í öldungaflokki 1 (M1) og samanlagður árangur, 575 kg, var einnig nýtt heimsmet í samanlögðu í þessum aldursflokki.

Bara fimm kílóum frá hennar allra besta

„575 kíló var tótalið mitt, sem er bara fimm kílóum frá mínu allra besta tótali. Minn besti samanlagði árangur á ferlinum er 580 kíló sem ég náði 2022 og skilaði mér silfri á HM. 575 í dag er sjötta sæti sem sýnir bara hvað hefur orðið gríðarleg þróun í sportinu og stelpurnar eru að verða mikið, mikið sterkari. Ég er stolt af minni frammistöðu,“ sagði Kristín.

„Ég náði öllum lyftunum mínum, þetta voru níu gildar af níu tilraunum. Það er alltaf góð tilfinning að maður skilji ekkert eftir á pallinum. Ég náði öllu úr mér sem dagsformið mitt bauð upp á þennan dag og ég er bara gríðarlega stolt og ánægð með þá frammistöðu,“ sagði Kristín.

Fyrsta sinn sem þjálfarinn er með á móti

„Mér til aðstoðar voru Auðunn Jónsson og Jason Tremblay. Jason er þjálfarinn minn sem býr til prógrammið fyrir mig og býr í Kanada. Þetta var í fyrsta sinn sem hann var að hjálpa mér á móti og þeir tveir, Auðunn og hann, unnu gríðarlega vel saman,“ sagði Kristín.

„Þeir þekkja mig báðir mjög vel sem íþróttamanneskju. Jason sér allar upptökur af öllum æfingunum mínum og Auðun hitti ég náttúrulega reglulega á Íslandi þegar ég er að æfa með honum í undirbúningi fyrir mót. Það er mjög gott að hafa fólk með sér sem þekkir mann vel og gott að taka ákvarðanir. Því þegar maður er sjálfur að keppa þá er maður bara í sínu actioni og á kannski erfitt með að takast á við einhverjar ákvarðanir sem þarf að taka, en þeir lásu mig alveg rétt í gær,“ sagði Kristín.

„Þeir sáu hvað ég átti inni, þannig að meldingarnar fyrir öllum lyftunum í gær voru réttar. Mér tókst að ná þarna bætingu í mastersflokki, setti heimsmet í réttstöðulyftu og samanlögðu, þannig að það er bara gríðarlega flott. Og ég bara átti mjög góðan dag og skemmti mér vel,“ sagði Kristín.