Sara Rós og Nicolò heims­meistarar

Sara fagnaði sigrinum á heimavelli því þetta var í fyrsta sinn sem heimsmeistaramót í samkvæmisdönsum fer fram á Íslandi. Þau Barbizi hafa dansað saman í tíu ár og lengi stefnt að titlinum sem nú er orðinn að veruleika.

Mótið var haldið í Garðabæ og fór fram samhliða Iceland Dance Festival.

Aðeins einu sinni áður hefur Ísland eignast heimsmeistara í atvinnumannaflokki í 10 dönsum, þegar Adam Reeve og Karen Björgvinsdóttir unnu sama titil fyrir 23 árum. 

Nicolò og Sara hafa búið og æft í Aarhus í Danmörku síðasta áratuginn og keppt fyrir hönd Íslands á alþjóðlegum stórmótum víðs vegar um heiminn, með frábærum árangri. Áður en þau færðu sig yfir í atvinnumannaflokk á síðasta ári hlutu þau 19 Íslandsmeistaratitla í flokki fullorðinna og fóru tvisvar í úrslit á EM í 10 dönsum. 

Árið 2025 urðu þau heimsmeistarar í Showdance Ballroom í atvinnumannaflokki og höfnuðu jafnframt í öðru sæti á heimsmeistaramótinu í 10 dönsum, aðeins einu stigi frá gullverðlaunum, sem gerði sigurinn um helgina enn sætari.