Chelsea-goðsögn leggur skóna á hilluna

Azpilicueta á að baki tuttugu ára feril en þetta tímabil verður hans síðasta. Spánverjinn byrjaði sinn feril hjá Osasuna en er líklegast þekktastur sem leikmaður og fyrirliði Chelsea í ensku úrvalsdeildinni.

„Eftir svo mörg ár að upplifa drauminn, er kominn tími á að byrja nýjan kafla í mínu lífi.“

Varnarmaðurinn þakkar öllum sem hann hefur spilað með og segist vera stoltur af því að fá að bera treyjur liðanna: Osasuna, Marseille, Chelsea, Atlético Madrid og Sevilla.

Azpilicueta gekk í raðir Chelsea árið 2012 undir stjórn samlanda síns Rafael Benitez. Hann var settur fyrirliði liðsins árið 2019 og gegndi því starfi þar til hann fór frá þeim bláu árið 2023. Þaðan fór hann aftur heim til Spánar og spilaði fyrir Atlético Madrid og kláraði ferilinn sinn hjá Sevilla.

Með Chelsea vann hann Evrópudeildina tvisvar, ensku úrvalsdeildina tvisvar, HM félagsliða, F.A. bikarinn og Meistaradeild Evrópu.

Azpilicueta er fimmti leikjahæsti leikmaður Chelsea frá upphafi og er því óhætt að segja að hann sé goðsögn innan félagsins.

Einnig á leikmaðurinn marga leiki fyrir spænska landsliðið og keppti með landsliðinu á þrem heimsmeistaramótum og tveimur Evrópumótum.