Adam Ingi og Valgeir í landsliðið og Stefán Teitur færður til

Sindri Sverrisson skrifar 20. maí 2026 15:10

Valgeir Lunddal Friðriksson og Adam Ingi Benediktsson eru á leiðinni til Japan. Samsett

Markvörðurinn Adam Ingi Benediktsson hefur verið kallaður inn í A-landsliðið í fótbolta og gæti spilað sinn fyrsta A-landsleik þegar Ísland mætir Japan í vináttulandsleik 31. maí.

Adam Ingi er 23 ára og ólst upp hjá FH og HK en hóf svo meistaraflokksferilinn í Svíþjóð þar sem hann lék til að mynda með IFK Gautaborg. Jóhannes Karl Guðjónsson, núverandi þjálfari FH, fékk hann svo til AB í Danmörku í fyrrasumar.

Adam Ingi hefur leikið fyrir yngri landslið Íslands en gæti nú þreytt frumraun sína með A-landsliðinu en auk hans eru Hákon Rafn Valdimarsson og Ögmundur Kristinsson markverðir í hópnum gegn Japan.

Sá leikur er utan opinbers landsleikjaglugga FIFA og því getur Arnar Gunnlaugsson ekki valið alla þá leikmenn sem hann kýs og til að mynda ekki leikmenn úr Bestu deildinni, fyrir utan Ögmund sem ekki hefur verið í leikmannahópi Vals í sumar.

Bakvörðurinn Valgeir kemur einnig inn í hópinn gegn Japan en Sverrir Ingi Ingason, sem glímt hefur við meiðsli, er dottinn út og þá var Stefán Teitur Þórðarson færður yfir í hópinn sem mætir Argentínu í Bandaríkjunum aðfararnótt miðvikudagsins 10. júní. Í þeim leik verður Ísland með sinn sterkasta hóp og mætir heimsmeisturunum með Lionel Messi í broddi fylkingar.

Hópurinn gegn Japan

* Breyting 20.05.26: Stefán Teitur Þórðarson, Adam Ingi Benediktsson og Valgeir Lunddal Friðriksson bætast við hópinn gegn Japan. Sverrir Ingi Ingason verður ekki með í leiknum.
Hákon Rafn Valdimarsson - Brentford F.C. - 21 leikur
Ögmundur Kristinsson - Valur - 19 leikir
* Adam Ingi Benediktsson - AB
Alfons Sampsted - Go Ahead Eagles - 23 leikir
Dagur Dan Þórhallsson - CF Montreal - 8 leikir
* Valgeir Lunddal Friðriksson - Fortuna Düsseldorf - 16 leikir
Hjörtur Hermannsson - Volos F.C. - 30 leikir, 1 mark
* Sverrir Ingi Ingason - Panathinaikos F.C. - 66 leikir, 4 mörk
Daníel Leó Grétarsson - Sonderjyske Fodbold - 29 leikir
Hörður Björgvin Magnússon - Levadiakos - 52 leikir, 2 mörk
Logi Tómasson - Samsunspor - 14 leikir, 1 mark
Willum Þór Willumsson - NEC Nijmegen - 18 leikir
Andri Fannar Baldursson - Kasimpasa S.K. - 12 leikir
Gísli Gottskálk Þórðarson - Lech Poznan - 2 leikir
Aron Einar Gunnarsson - Al-Gharafa - 108 leikir, 5 mörk
* Stefán Teitur Þórðarson - Hannover 96 - 36 leikir, 1 mark
Mikael Egill Ellertsson - Genoa CFC - 29 leikir, 2 mörk
Kristian Nökkvi Hlynsson - FC Twente - 11 leikir, 2 mörk
Brynjólfur Andersen Willumsson - FC Groningen - 9 leikir, 1 mark
Stefán Ingi Sigurðarson - Go Ahead Eagles
Viktor Bjarki Daðason - FC Köbenhavn
Benoný Breki Andrésson - Stockport County F.C.