Þórir og Ómar ganga til liðs við Vett­vang

„Munu þeir starfa þvert á starfsemi systurfyrirtækisins Apparatus, sem sérhæfir sig í þróun app-lausna.“

Þórir kemur inn í hlutverk teymisstjóra hönnunar (e. design lead), en hann er stofnandi hönnunarstofunnar Snowhouse Studio og hefur á undanförnum árum unnið að fjölda alþjóðlegra verkefna á sviði stafrænnar hönnunar og veflausna. Meðal fyrirtækja sem Þórir hefur unnið með eru Wave, Vanta, DBT Labs, Veed, Mara Holdings og School of Motion. Í nýju hlutverki mun Þórir nýta alþjóðlega reynslu sína til að styðja við áframhaldandi vöxt hönnunardeildar systurfyrirtækjanna, þar sem lögð er rík áhersla á markmiðadrifna nálgun og árangur í rekstri.

Ómar kemur einnig inn í hönnunarteymið en hannhefur starfað að UI/UX hönnun síðan 2018. Ómar kom meðal annars að því að þróa Upcado spjallmennakerfið hjá Startup Reykjavik, sem gerði íslenskum fyrirtækjum kleift að smíða eigin Facebook Messenger spjallmenni. Hann stofnaði síðar vefstofuna Mojo og hannaði þar lausnir fyrir fjölbreytta starfsemi. Ómar er nýkominnfrá Kyrrahafseyjunni Balí þar sem hann starfaði sem Jiu-Jitsu þjálfari.

Vettvangur og Apparatus vinna náið saman að þróun vef- og applausna fyrir leiðandi fyrirtæki eins og Domino’s, KSI, Lyfju, Atlantsolíu og Eimskip og hafa hlotið fjölda viðurkenninga fyrir verkefni sín, hérlendis sem erlendis.

Í tilkynningu er haft eftir Elmari Gunnarssyni, framkvæmdastjóra Vettvangs, að með stækkun og styrkingu teymisins verði lögð ríkari áhersla á að þróa notendaviðmót og þjónustu sem mætir þörfum notenda á einfaldan, skýran og mannlegan hátt. 

„Á tímum þar sem gervigreind gegnir sífellt stærra hlutverki í þróun stafrænna lausna, leggur teymið sérstaka áherslu á að halda í mannlega nálgun í hönnun. Við trúum því að góð hönnun snúist ekki eingöngu um tækni, heldur um skilning á fólki. Markmið okkar er að skapa lausnir sem eru ekki bara skilvirkar, heldur einnig skiljanlegar, aðgengilegar og auðveldar í notkun,“ er haft eftir Elmari.