Barcelona getur tryggt sér titilinn gegn Real Madrid

Barcelona vann 1-2 útisigur á Osasuna á laugardaginn. Þar með var ljóst að liðið yrði meistari ef Real Madrid misstigi sig gegn Espanyol í gær. Það gerðist ekki því Real Madrid vann 0-2 sigur með tveimur mörkum frá Vinícius Júnior.

Barcelona er með ellefu stiga forskot á Real Madrid en liðin mætast á Nývangi næsta sunnudag. Ef Börsungar ná í stig í leiknum tryggja þeir sér titilinn gegn erkifjendum sínum, eitthvað sem stuðningsmönnum þeirra myndi eflaust ekki leiðast.

Ef Barcelona nær í stig gegn Real Madrid um næstu helgi verður liðið Spánarmeistari annað árið í röð og 29. sinn alls.

Barcelona er með 88 stig og fjórir leikir eru eftir. Börsungar geta því alls fengið hundrað stig. Aðeins tvö lið hafa afrekað það: Real Madrid 2011-12 og Barcelona 2012-13.

Svo lengi sem Barcelona kastar Spánarmeistaratitlinum ekki frá sér á ótrúlegan hátt stendur Real Madrid uppi titlalaust eftir tímabilið.

Real Madrid vann fyrri deildarleikinn gegn Barcelona á þessu tímabili, 2-1. Kylian Mbappé og Jude Bellingham skoruðu mörk Madrídinga en Fermín López mark Börsunga.