„Ég var mjög skrítinn krakki“

Tómas Arnar fékk tækifæri til að kíkja í heimsókn á vinnustofu listamannsins þar sem hann var í óðaönn að gera allt tilbúið fyrir sýningu á sínum nýjustu verkum. Tómas ræddi við hann í Ísland í dag á Sýn í gærkvöldi.

Sýningin ber heitið Negatívur og þar gefst fólki tækifæri til að heimsækja listamanninn, sjá vinnuaðstöðu hans og 26 splunkunýjar lágmyndir.

„Það er ekki oft sem maður er með heilan myndavegg fyrir sjálfan sig, en það gerist svona rétt fyrir sýningar. Það er virkilega ánægjulegt. Þegar ég var 10 ára ákvað ég að ég ætlaði að verða arkitekt,“ segir Pétur sem fór aðra leið.

Meikaði sens

„Mér fannst það svona bara meika sens. Og mér fannst rými rosalega heillandi og var alltaf að pæla í rýmum. Ég var mjög skrítinn krakki sko og var alltaf að teikna í þrívídd og búa til eitthvað rými. Ég hef alltaf verið mjög kreatívur. Ég var í dansi sem krakki og elskaði alltaf að teikna. Svo fór ég yfir í vídeógerð og sketsagerð og svo leiklist og allt þetta einhvern veginn svona blandaðist saman. Manni fannst alltaf svo gaman að búa eitthvað til og skapa eitthvað.“

Pétur hefur alltaf verið skapandi en fyrst hann minnist á vídeógerð þá má nefna að maðurinn er hálfgerð goðsögn í Verslunarskólanum. Þar gerði hann garðinn frægan í söngleikjum og með myndbandsnefndinni Rjómanum í upphafi gullaldar menntaskólamyndbandsgerðar. Í menntaskóla fór Pétur einnig að prófa sig áfram með forrit líkt og Photoshop og fleira. Og ástríða fyrir grafík fór að gera vart við sig og förinni haldið í Listaháskólann.

Seldi allt upp

„Svo þegar maður svona hélt áfram í grafíkinni, þá fór ég í skiptinám hérna til Amsterdam í Rietveld-akademíunni. Ég fékk eiginlega bara svona tiltal frá einum kennara, sem bara var að segja, Pétur þú veist að grafík er bara hagnýt myndlist.“

Hann segir það þó hafa verið ógnvænlegt að stefna á að lifa á listinni sem áður hafi verið fjarlægur draumur.

„Ég var alveg grafískur hönnuður í nokkur ár og hélt síðan svona mína fyrstu sýningu eftir að hafa verið hérna með vinnustofu á Bræðraborgarstíg. Ég var búinn að vera að þróa þessar lágmyndir. Þetta var eiginlega bara framhald af útskriftarverkinu mínu. Þá ákveð ég að halda smá sýningu og sýna fólki þetta. Svo seldist sú sýning upp,“ segir Pétur.

Pétur stendur fyrir listasýningu um þessar mundir en sýningin stendur til 19. april og er við Bæjarhrauni 24 í Hafnarfirði. 

Fólk getur fylgst með honum á peturgeir.is eða á instagram undir reikningnum @petgmag.