Tölur á móti Sviss: Sviss með 25 mörk eftir að hafa opnað ís­lensku vörnina

Íslenska liðið bjargaði stiginu og gat skorað sigurmarkið úr lokasókn leiksins en miðað við frammistöðuna átti liðið ekkert lítið skilið úr þessum leik.

Svisslendingar löbbuðu í gegnum íslensku vörnina nær allan leikinn og skoruðu alls 25 mörk í leiknum eftir að hafa opnað vörnina með gegnumbrotum (9), mörkum af línu (8) eða mörkum úr hornum (8). Í viðbót bætast síðan við sex svissnesk mörk úr hraðaupphlaupum og tvö af vítalínunni.

Varnarleikurinn í fyrri hálfleik var hörmulegur enda fékk íslenska liðið á sig nítján mörk þótt Viktor Gísli væri með níu varin skot í hálfleiknum. Svisslendingar voru að fá samanlagt fimm mörkum meira úr gegnumbrotum (5-2) og af línu (4-2) en þar munaði mikið um fjögur íslensk klúður af línunni í fyrri hálfleiknum. Arnar Freyr Arnarsson átti þrjú af þessum klúðrum.

Íslenska liðið var líka aðeins með fimm löglegar stöðvanir í fyrri hálfleiknum sem segir mikið um kraftleysið og skort á grimmd í varnarleik íslenska liðsins. Þetta lagaðist aðeins í seinni hálfleiknum en ekki mikið en á móti datt markvarslan algjörlega niður.

Hröðu sóknirnar gengu samt oftast vel, sérstaklega eftir innkomu Viggós, en íslenska liðið var komið með níu hraðaupphlaupsmörk eftir fyrri hálfleikinn, fjögur þeirra úr annarri bylgju. Það bættust bara þrjú við í seinni hálfleiknum þar sem íslenska liðið var að gera mikið af fljótfærnismistökum í umræddum hröðum sóknum.

Gísli Þorgeir Kristjánsson var áfram að skapa færi en hann var með sjö stoðsendingar og níu sköpuð færi í fyrri hálfleik. Sóknarleikurinn gekk vel hvað það varðar að skapa færi en alltof mörg dauðafæri fóru þó forgörðum. Gísli skoraði líka góð mörk í seinni hálfleik og endaði með ellefu stoðsendingar en þurfti meiri hjálp.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fyrsta leik Íslands á mótinu.