Kristall Máni á skotskónum og fyrsti sigurinn síðan í ágúst

Sönderjyske vann þá 3-0 heimasigur á Fredericia en leikmenn Sönderjyske höfðu leikið fjóra deildarleiki í röð án sigurs og ekki unnið síðan 31. ágúst.

Kristall Máni Ingason og landsliðsmiðvörðurinn Daníel Leó Grétarsson voru báðir í byrjunarliði Sönderjyske.

Kristall Máni skoraði fyrsta mark leiksins strax á níundu mínútu og Alexander Lyng bætti síðan við öðru marki á 43. mínútu.

Rasmus Vinderslev skoraði síðan þriðja markið eftir 68. mínútu og sigurinn var aldrei í hættu.

Þetta var þriðja deildarmark Kristals en um leið það fyrsta síðan hann skoraði í umræddum sigurleik á móti Silkeborg í lok ágúst.