Viðskipti innlent

Skattur á streymisveitur geti skilað 150 milljónum

Árni Sæberg og Vésteinn Örn Pétursson skrifa
Logi Már er ráðherra menningarmála.
Logi Már er ráðherra menningarmála. Vísir/Ívar Fannar

Ráðherra menningarmála segir boðaða skattheimtu af streymisveitum munu skila ríkissjóði um 140 til 150 milljónum króna á ári. Markmiðið sé að auka aðgengi að innlendu sjónvarpsefni auk þess að styrkja stöðu innlendra streymisveitna gagnvart erlendum risum.

Menningar, nýsköpunar- og háskólaráðuneytið kynnti  ígær til samráðs drög að frumvarpi um svokallað menningarframlag bæði innlendra og erlendra streymisveitna. Það felur í sér fimm prósenta skatt af heildartekjum hér á landi. 

Í tilkynningu sagði að á síðustu árum hefði samkeppni við alþjóðlegar streymisveitur og samfélagsmiðla haft neikvæð áhrif á rekstrarumhverfi og samkeppnisstöðu innlendra fjölmiðla, sem kæmi niður á framleiðslu innlends efnis og veikti þar með stöðu íslenskrar tungu.

Takast á við breytta heimsmynd

„Þetta er í rauninni gert vegna þessarar breyttu heimsmyndar, þar sem innlend fyrirtæki eru í flóknari og erfiðari samkeppni við þessi stóru streymisfyrirtæki. Hugmyndin er að innheimta skatt af heildartekjum hér innanlands, sem hægt er, í rauninni, að losna við ef framleitt er fyrir fimm prósent af heildartekjunum af efni undir íslenskum formerkjum,“ sagði Logi Már Einarsson, menningar, nýsköpunar- og háskólaráðherra, í samtali við fréttastofu í morgun.

Undanþágan afurð samráðs

Hann segir að tekið hafi verið mið af því sem kom fram í samráðferli við gerð frumvarpsins og í því sé hugsunin að vera með undanþáguákvæði, sem geri það að verkum að innlendu streymisveiturnar lendi ekki í því að þurfa að greiða skattinn.

„Við sáum það þegar þetta fór í samráð í fyrra, meðal annars í áliti frá Sýn, að þeir hefðu ekki fallið undir það þá og við munum auðvitað hlusta á þær raddir. Þetta er fyrst og fremst gert til þess bæði að örva framleiðslu á innlendu efni og styrkja framleiðslu innlends efnis en einnig til þessa bæta samkeppnisstöðu innlendu fjölmiðlafyrirtækjanna gagnvart erlendu risunum.“

140 til 150 milljónir 

Logi Már segir að talað hafi verið um, eins og frumvarpið er núna, að það muni skila um 140 til 150 milljónum króna í ríkiskassann, sem muni renna áfram í Kvikmyndasjóð og aðra farvegi sem muni nýtast.

„Það hefur verið kallað eftir þessu í mörg ár af innlendum fyrirtækjum og við munum vanda okkur við útfærslu og vera í góðu samráði við fyrirtækin,“ segir hann að lokum.






Fleiri fréttir

Sjá meira


×