Þungaður LeBron leggst þungt á LeBron

Fréttamiðillinn 404 Media greinir frá málinu sem er merkilegt fyrir þær sakir að þetta er í fyrsta skipti sem jafnstór stjarna og James hótar gervigreindarfyrirtæki málsókn vegna óleyfilegs efnis sem byggir á líkindum hans.

Sjá einnig: Nektarmyndir af Swift skapaðar af gervigreind í dreifingu

Jason Stacks, stofnandi gervigreindarvettvangsins Flickup sem rekur Interlink, birti myndband á Instagram-síðu í júnílok þar sem hann sýndi bréfið frá lögfræðiteymi James. 

Seint í júnímánuði greindu forsvarsmenn Interlink notendum frá því að búið væri að fjarlægja „líkön af raunverulegum persónum“ af gervigreindarsíðunni.

„Þessi breyting kemur í kjölfar þess að við lentum í lagalegum vandræðum sem tengdust mikilsmetnum körfuboltamanni og til að forðast frekari meinbugur höfum við tekið frumkvæði og fjarlægt algjörlega öll raunveruleg líkindi fólks af síðunni,“ skrifuðu eigendur Interlink á Discord-síðu fyrirtækisins.

Stacks greindi síðan frá því í samtali við 404 Media í vikunni að ákvörðunin hefði verið tekin hálftíma eftir að fyrirtækinu barst bréfið frá lögfræðistofunni Grubman Shire Meiselas & Sacks.

Hafmeyja, heimilislaus og óléttur

Notendur Interlink bjuggu til fjölmörg myndbönd af James og öðrum stjörnum á síðustu mánuðum sem höfðu rakað inn milljónum áhorfa. Þar á meðal voru gervigreindarmyndbönd af heimilislausum James, honum ólettum og honum sem hafmeyju og eitt myndband af honum fylgjast með Diddy misnota körfuboltamanninn Steph Curry.

Fyrir utan myndbönd af James mátti sjá fjölda annarra þekktra einstaklinga á síðunni, svosem Elon Musk, Drake, og Kanye West.

Þar að auki hefur Instagram eytt þremur aðgöngum sem áttu þátt í að deila gervigreindarmyndböndum af James án hans samþykkis. Meta hefur ekki tjáð sig um það hvort fyrirtækinu barst sambærilegt bréf frá lögfræðiteymi James.