Stöðugt spurðir hvers vegna þeir ætt­leiddu ekki bara

Saga þeirra Frederik og Morten vekur gríðarlega athygli í Danmörku vegna frægðar þeirra og hefur danska ríkisútvarpið til sýningar heimildarþætti um ný hlutverk þeirra. Frederik sló í gegn í raunveruleikaþættinum Den store bagedyst og Morten í þættinum, Allir geta dansað í Danmörku. Þeir lýsa miklum raunum og baráttu við kerfið.

Dætur þeirra, Emma og Nora, komu í heiminn þann 27. september með aðstoð hinnar 33 ára gömlu Nönnu Brandt, sem sjálf er gift og móðir tveggja drengja. Eggjagjafinn er svo frá Bandaríkjunum, en Frederik og Morten eru hvor um sig líffræðilegir feður sitthvorrar stúlkunnar. 

Þeir segja að þrátt fyrir þetta hafi þeir þurft að ganga á eftir lagalegum réttindum sínum í marga mánuði. Fyrst um sinn samþykkti danska ríkið ekki rétt þeirra til hluta líkt og fæðingarorlofs, barnabóta og aðgengi að heilbrigðiskerfinu.

Vonast eftir breyttri löggjöf samkynja para

Eins og áður kemur fram hóf danska ríkissjónvarpið DR1 nýverið sýningar á nýrri heimildaþáttaröð, Pabbi, pabbi og börn, þar sem fylgst er með Frederik, Morten og staðgöngumóður þeirra, Nönnu, í rúmt ár. Þættirnir skrásetja ferðalag hjónanna, allt frá fyrstu ákvörðun þeirra um að eignast barn saman til þess magnaðs augnabliks þegar þeir fengu loks dætrum sínar í fangið í fyrsta sinn.

„Ferðalagið okkar að því að verða foreldrar, með stuðningi Nönnu og hennar frábæru fjölskyldu, hefur verið sannkallaður tilfinningarússíbani, með miklum hæðum og lægðum,“ segja hjónin um þáttinn í færslu á Instagram.

Frederik og Morten vonast til að þátturinn stuðli að auknum skilningi samfélagsins á stöðu samkynja para sem vilja stofna fjölskyldu. „Við vonum að heimildarþættirnir geti stuðlað að auknum skilningi og jafnvel sett af stað mikilvæga umræðu um að breyta danskri löggjöf, þannig að frjósemismeðferðir í Danmörku verði aðgengilegar fyrir alla – óháð kyni,“ segja þeir.

Ást og umhyggja óháð kyni foreldra

Í kjölfar frumsýningarinnar segir Frederik að þeim hafi borist fjölda spurninga frá fólki hvers vegna þeir hafi ekki frekar ákveðið að ættleiða barn?

„Eins og svo margir aðrir dreymdi okkur að verða foreldrar. Við áttum einnig þá ósk að verða líffræðilegir foreldrar, og því var staðgöngumæðrun rétta leiðin fyrir okkur. Okkar leið hefur verið frábrugðin hefðbundnum leiðum þar sem við erum tveir karlar og fengum aðstoð frá Nönnu, en löngunin til að eignast börn og stofna fjölskyldu er nákvæmlega sú sama og hjá öllum öðrum sem dreyma um foreldrahlutverkið,“ segir Frederik í einlægri færslu á Instagram. 

Þeir benda á að ættleiðingarferlið sé oft langt og strangt, sérstaklega fyrir samkynja pör, þar sem flest lönd sem bjóða upp á alþjóðlega ættleiðingu samþykkja ekki samkynja foreldra.

„Spurningin um ættleiðingu kemur oft upp þar sem fólki finnst það vera augljósasti kosturinn fyrir okkur. Sumir spyrja af hreinni forvitni, en aðrir nota spurninguna til að draga rétt okkur til þess að eignast börn í efa. En mikilvægustu réttindi barna er að alast upp í kærleiksríku, öruggu og umhyggjusömu umhverfi. Það er ekki kyn foreldra sem skiptir máli heldur hæfni þeirra til að elska, styðja og vera til staðar fyrir barnið sitt.“