Um 800 milljónir manna í heiminum með sykur­sýki

Þetta eru niðurstöður nýrrar rannsóknar, sem voru birtar í Lancet á dögunum.

Um er að ræða samstarfsverkefni Alþjóðaheilbrigðisstofnunarinnar og NCD-RisC en rannsóknin náði til 140 milljón einstaklinga 18 ára og eldri og yfir þúsund rannsókna alls staðar að úr heiminum.

Meira en helmingur einstaklinga með sykursýki býr í fjórum löndum; Indlandi (212 milljónir), Kína (148 milljónir), Bandaríkjunum (42 milljónir) og Pakistan (36 milljónir). Þá er áætlað að 25 milljónir séu með sykursýki í Indónesíu og 22 milljónir í Brasilíu.

Dreifingin er afar misjöfn eftir ríkjum en í sumum ríkjum í Kyrrahafinu, Karabíska hafinu, Mið-Austurlöndum og Afríku er tíðnin um 25 prósent meðal fullorðinna á meðan hún er tvö til fimm prósent í ríkjum á borð við Danmörku, Frakkland og Spán.

Öldrun þjóða auk aukinnir tíðni offitu eru meðal þeirra þátta sem hafa stuðlað að fjölgun einstaklinga sem eiga á hættu að þróa með sér sykursýki týpu 2. Yfir 95 prósent einstaklinga með sykursýki eru með sykursýki týpu 2.

Ítarlega umfjöllun um málið má finna hjá Guardian.