Ljúffeng flensubanasúpa

Svava Marín Óskarsdóttir skrifar 21. október 2024 12:01

Linda Ben töfraði fram ljúffenga og matarmikla kjúklingasúpu með núðlum og sprettum.

Nú þegar haustið er mætt í allri sinni dýrð, fer hið árlega kvef og kuldahrollur að láta á sér bera. Þá er fátt betra en að njóta matarmikillar og heitrar súpu til að fá hlýju í kroppinn. Matarbloggarinn Linda Benediktsdóttir deildi nýverið uppskrift að ljúffengri kjúklingasúpu sem er tilvalin á köldu haustkvöldi.

„Þessi kjúklinganúðlusúpa er ekki bara svakalega góð heldur eru kjúklingasúpur líka þekktar fyrir að virka sem algjörir flensubanar. Súpan inniheldur alveg helling af grænmeti sem er maukað og því hentug fyrir m.a. litla kroppa sem segjast oft ekki vilja borða grænmetið sitt. Núðlurnar gera þessa súpu einstaklega lystuga, matarmikla og góða.

Súpan er svo borin fram með sprettum sem gefa henni ekki bara gott bragð og gerir hana fallega, heldur eru sprettur með því hollara sem maður borðar. Stútfull af vítamínum, steinefnum, trefjum og plöntunæringarefnum sem gera okkur gott,“ skrifar Linda.

Flensubana kjúklingasúpa

Hráefni:

3 kjúklingabringur

2 msk kókosolía (til að steikja upp úr, skipt í tvennt)

1 msk kjúklingakryddblanda

1 laukur

3 sellerístilkar

1 1/2 rauð paprika

5 gulrætur

2-3 cm engifer (fer eftir þykkt)

4 hvítlauksgeirar

1 líter vatn

400 ml kókosmjólk

1 msk kjúklingakraftur eða 2 teningar

1/2 tsk túrmerik

1 tsk paprikukrydd

Salt & pipar

125 g eggjanúðluur

Sprettur baunaspírur frá Vaxa

Aðferð:

Skerið kjúklingabringurnar í litla bita, kryddið vel með kjúklingakryddi og steikið í potti upp úr kókosolíu. Þegar kjúklingurinn er tilbúinn þá takið hann upp úr pottinum.

Skerið laukinn, selleríið, papriku og gulrætur í bita og steikið upp úr kókosolíu. Rífið engifer og hvítlauk út í pottinn og steikið.

Bætið vatni og kókosmjólk út í pottinn, leyfið þessu að sjóða saman á vægum hita. Notið töfrasprota og maukið súpuna.

Kryddið til með kjúklingakrafti, túrmerik, paprikukryddi, salti og pipar.

Bætið kjúklingnum aftur út í súpuna og setjið eggjanúðlurnar líka ofan í pottinn. Leyfið þessu að malla í 5 mín.

Berið fram með sprettum.