Verður þér skipt út fyrir kynlífstæki?

Hvað er eðlilegt? Við erum stöðugt að bera okkur saman við aðra eða miða okkur við eitthvað ósýnilegt handrit um kynlíf. Í þessu handriti er markmiðið í kynlífi fullnæging, helst þar sem báðir aðilar fá fullnægingu á sama tíma í miðjum samförum. Þegar okkar upplifun er á einhvern hátt öðruvísi er stutt í skömm og einmitt þennan ótta um að vera ekki eðlileg.

Það eru mjög mörg sem tengja við það að geta ekki fengið fullnægingu nema með örvun frá kynlífstæki og það er ekkert óeðlilegt við það. Það er líka í góðu lagi að vilja stundum fá það bara snögglega! Skoðum hvað getur verið að hafa áhrif á það að við fáum frekar fullnægingu með aðstoð kynlífstækja.

Kynlífstæki hvort sem þau eru notuð í kynlífi með maka/bólfélaga eða á meðan við erum ein að stunda sjálfsfróun eru hönnuð til að veita örvun.

• Kynlífstæki eru sum ætluð píkum, sum ætluð typpum og önnur fyrir endaþarmsörvun.
• Þau veita stöðuga örvun sem beinist beint að því svæði sem við notum kynlífstækið á.
• Einnig örva þau gjarnan akkúrat á þann máta sem þér finnst gott að láta örva þitt kynfæri eða endaþarm. Oft er hægt að hækka eða lækka styrkinn eða breyta um takt. Sum tæki soga á meðan önnur víbra.
• Með kynlífstækjum er hægt að kynnast því hvað þér finnst gott og hvernig örvun virkar best fyrir þig!
• Kynlífstæki geta verið skemmtileg leið til að prófa eitthvað nýtt!
• Að lokum eru kynfærin okkar misnæm. Sum þurfa meiri örvun á meðan önnur þurfa minni. Ef við tengjum við það að þurfa meiri örvun geta kynlífstæki verið frábær leið til að koma okkur þangað!

Af hverju er stundum auðveldara að fá fullnægingu ein með kynlífstæki á meðan það getur verið flóknara að fá það með maka/bólfélaga? Nú er gott að spyrja sig: hvernig er það ólíkt að stunda sjálfsfróun ein eða stunda kynlíf með öðrum?

• Mjög margt getur haft áhrif á það hvernig okkur líður í kynlífi með öðrum. Við getum átt erfiðara með að fókusera á okkar unað. Mögulega vegna streitu, frammistöðukvíða, ólíkra væntinga eða vegna líkamsímyndar.
• Þegar þú ert ein í sjálfsfróun veistu nákvæmlega hvað þú vilt en með öðrum þarf að miðla, sýna eða leiðbeina. Hefur þú rætt hvað þér finnst gott? Eða hvernig þér finnst gott að láta snerta þig?
• Minnihluti kvenna og fólks með píku fær fullnægingu í gegnum samfarir. Það er mikilvægt að kynlíf snúist þá líka um það sem veitir þér sem mesta örvun hvort sem það eru munnmök eða notkun kynlífstækja.
• Rannsóknir hafa sýnt að það tekur konur og fólk með píku að meðaltali 13 mínútur að fá fullnægingu í kynlífi með öðrum. Það að kyssast heitt og innilega, örva allan líkamann, veita munnmök og örvun snípsins geta spilað þar lykilþátt.
• Er óþolinmæði að spila inn í? Gefðu þér tíma! Það í góðu lagi að þú þurfir góðan tíma til að kveikja á þinni löngun og fyrir líkamann að bregðast við.

Í raun er markmiðið í kynlífi ekki fullnæging. Það er í góðu lagi að fá ekki fullnægingu en ef þú vilt fá það með maka/bólfélaga væri gott fyrsta skref að ræða kynlífið ykkar. Jafnvel fróa ykkur saman og þá má grípa tækifærið til að leiðbeina og sýna viðkomandi hvað virkar best fyrir þig. Síðan er ágætt að skoða hvort kynlífstæki megi ekki bara vera hluti af ykkar kynlífi?

Fyrir þá maka/bólfélaga sem óttast að kynlífstækið leysi ykkur af hólmi, andið djúpt! Þó að maki fái ekki fullnægingu í kynlífinu segir það ekkert endilega neitt um þig, kynlífið eða sambandið. Ræðið saman og skoðið hvort það sé eitthvað sem þið gætuð verið að gera öðruvísi. Ef niðurstaðan er sú að maki þinn mun áfram þurfa þessa auka örvun skaltu treysta því að þér verði ekki skipt út fyrir kynlífstækið. Að leika sér saman með kynlífstækin er mun skemmtilegri nálgun en að upplifa sig vera í samkeppni við þau!