Heimi var sagt að leyna því að hann væri tann­læknir

Óteljandi greinar voru skrifaðar í kringum Evrópumótið 2016 varðandi tannlæknastarf Heimis, sem þá stýrði ásamt Lars Lagerbäck Íslandi til sigurs á Englandi í 16-liða úrslitum. Nú ætlar hann að endurtaka leikinn sem þjálfari Írlands, eftir að hafa verið ráðinn í starfið í sumar.

Í grein The Sun segir Heimir að sér hafi á sínum tíma verið sagt að halda því leyndu að hann væri tannlæknir en ekki aðeins fótboltaþjálfari.

„Þegar ég var að ná mér í þjálfaragráðuna í Englandi þá var sagt við mann: „Ekki segja neinum að þú sért tannlæknir!“

En ég held að menntun geti aldrei skaðað mann. Ég er stoltur af því að vera tannlæknir,“ segir Heimir sem eftir ævintýrið með íslenska landsliðinu hefur einnig þjálfað Al Arabi og landslið Jamaíku.

Rifjað upp þegar Heimir kom Rut til bjargar

Grein The Sun er uppfull af orðagríni tengdu tönnum og tannlækningum, og þar er einnig rifjað upp þegar Heimir brást skjótt við á Hásteinsvelli, skömmu eftir EM 2016, þegar Fylkiskonan Rut Kristjánsdóttir missti tönn í miðjum leik.

Þjálfarastarfið hefur auðvitað verið aðalstarf Heimis í mörg ár en hann segir: „Það að vinna sem tannlæknir hefur hjálpað mér mikið, því maður er stöðugt að vinna með einstaklinga. Sumir eru hræddir við tannlækna, svo maður þarf að finna réttu leiðina til að tala við hvern og einn.

Maður gæti þurft að róa einn, vera skemmtilegur við annan og alvarlegur við þann þriðja. En maður verður að vera fljótur að aðlagast. Sama má segja um samskipti við fótboltamenn,“ segir Heimir.

England líka með nýjan þjálfara

Heimir var ráðinn landsliðsþjálfari Írlands 231 degi eftir að Stephen Kenny hætti sem þjálfari liðsins. Í millitíðinni stýrði John O‘Shea liðinu í nokkrum leikjum, og sótti Heimir það fast að fá O‘Shea sem aðstoðarþjálfara, sem gekk eftir.

Englendingar mæta til leiks á laugardaginn í fyrsta leik sínum eftir úrslitaleik EM, og eftir að Gareth Southgate hætti með liðið. Þeir spila undir stjórn Lee Carsley sem var ráðinn tímabundið á meðan að leit stendur yfir að varanlegum arftaka.

Heimir segir margt líkt með Írum og Englendingum:

„Karakterinn er mjög svipaður. Venjulega þurfa menn bara 1-2 drykki áður en þeir byrja að syngja. Írarnir leggja hart að sér og eru stoltir, stoltir af sinni arfleifð og því sem þeir eru. Það er alltaf hægt að byggja á því þegar menn leggja hart að sér og eru stoltir.“