„Ástin var svo sannar­lega í loftinu þetta kvöld“

Þorði varla að trúa því að hann væri að fara að biðja

Hjúin trúlofuðu sig í París 30. mars 2023.

„Krissi bað mín í bátsferð á Seine ánni þann 30.03.23 en við vorum í París til þess að fagna afmæli bestu vinkonu minnar sem er búsett þar. Mig var farið að gruna að það væri bónorð á leiðinni þar sem hann spurði mig óvenju oft hvort ég væri ekki örugglega búin að panta tíma í neglur fyrir ferðina en það er eitthvað sem hann lætur sig vanalega ekki mikið varða, segir Mariane og hlær.

Það var síðan vægast sagt rafmögnuð stemning í loftinu þegar við stóðum við árbakkann og biðum eftir bátnum þar sem við vissum bæði hvað væri að fara gerast en ég samt þorði varla að trúa því.“

Dásamlegur í alla staði en líka smá stressandi

Þau vildu svo ekki bíða of lengi með stóra daginn.

„Við vorum búin að ræða að ef og þegar við trúlofuðum okkur myndum við vilja halda brúðkaupið innan tveggja ára sem við stóðum síðan við. Um leið og við komum heim frá París skrifuðum við upp drög að gestalista og þar með hófst undirbúningurinn í rauninni.“

Aðspurð hvernig brúðkaupsdagurinn var svarar Mariane kímin:

„Þetta var einn eftirminnilegasti dagur lífs okkar, hann var dásamlegur í alla staði og kannski smá stressandi líka.

Það sem stóð upp úr hjá mér var að fá tækifæri til þess að vera með öllum okkar bestu vinum og nánustu fjölskyldu í einu herbergi og fá að halda geggjað partí til þess að fagna ástinni. Kvöldið ógleymanlegt í alla staði og ástin var svo sannarlega í loftinu þetta kvöld.

Ég verð líka að nefna hér hvað þjónustan frá bæði Gamla Bíó og 4 árstíðum stóð upp úr en báðir aðilar léttu svo á álaginu á okkur á deginum sjálfum. Gamla Bíó heldur í höndina á manni í gegnum allt undirbúningsferlið og eru svo hokin af reynslu að keyra veislur, þannig að allt gekk betur en smurt fyrir sig.

Elísa og þær í 4 árstíðum þurftu ekki nema einn fund til að skilja sýnina okkar fyrir daginn og síðan mæta þær og setja allt upp fyrir mann. Maður þarf ekki að hafa neinar áhyggjur, algjörar fagkonur.“

Fékk sjokk þegar hún sá hvað sumir brúðarkjólar kosta

Mariane klæddist einföldum og glæsilegum hvítum brúðarkjól.

„Það gekk eiginlega hlægilega vel að velja kjólinn miðað við sjokkið sem ég fékk þegar ég sá hvað sumir brúðarkjólar kosta. Ég útbjó lista af kjólum sem ég hafði áhuga á og fann síðan einn þeirra fyrir algjöra slysni í kremju á útsölurekka í Selfridges í London en við vorum að heimsækja vini þar sumarið eftir að við trúlofuðumst.

Ég henti honum síðan bara í hreinsun og fékk Berglindi í klæðaskerahöllinni á Hringbraut til að sníða hann að mér og ég hefði ekki getað verið sáttari.“

Hjúin flugu svo í grísku sólina beint eftir brúðkaupið.

„Við byrjuðum í Aþenu og höfum svo eytt síðastliðinni viku á gullfallegu eyjunni Milos. Við förum til Rómar á morgun þar sem við stöldrum stutt við áður en förinni er svo heitið til Puglia sem er langþráður áfangastaður.“

Hér má sjá fleiri myndir frá brúðkaupinu: