Ingi­björg Ösp yfir nýrri rekstrar­ráð­gjöf Expectus

Í fréttatilkynningu þess efnis segir að undanfarin ár hafi starfsemi Expectus þróast í auknum mæli yfir í ráðgjöf á sviði viðskiptagreindar og upplýsingatækni. Til að skerpa á áherslum í starfsemi félagsins og þróa enn frekar aðra ráðgjöf, færist nú rekstrar- og stjórnunarráðgjöf yfir í nýtt félag.

Áherslur í nýju félagi muni felast í fjölbreyttum verkefnum, meðal annars á sviði stefnumótunar, breytingastjórnunar, stefnuinnleiðingar, skipulagsmála og ýmiss konar þróunarverkefna. Þetta nýja skipulag taki gildi 1. ágúst næstkomandi og starfsemi nýja félagsins muni fléttast þétt saman við þjónustu móðurfélagsins, Expectus, þegar kemur að viðskiptagreiningu, gagnavinnslu og upplýsingamiðlun. 

Í stjórn félagsins sitji, auk Ingibjargar, þeir Ragnar Þórir Guðgeirsson stjórnarformaður og Reynir Ingi Árnason framkvæmdastjóri Expectus.

Expectus hafi undanfarin ár vaxið hratt á sviði gagnavinnslu, áætlanagerðar viðskiptagreindar og tæknilausna. Sterk rekstrarleg þekking ásamt tækniþekkingu hafi einkennt fyrirtækið og með þessari breytingu sé verið að gefa rekstrar- og stjórnunarráðgjöfinni nýjan grunn til vaxtar, byggt á fjölda árangursríkra verkefna sem Expectus hafi komið að með fyrirtækjum og stofnunum í íslensku atvinnulífi á síðastliðnum fimmtán árum.

Munu vinna náið saman

Í tilkynningu er haft eftir Reynir Ingi Árnason, stofnanda Expectus, að stofnun nýs félags sé liður í að þróa þjónustuframboð og styrkja fókus í ólíkum verkefnum en að félögin verði í nánu samstarfi í mörgum verkefnum. 

„Áskoranir fyrirtækja í íslensku atvinnulífi taka stöðugum breytingum og því er það mikil áskorun stjórnenda og skipulagsheilda að bregðast við og aðlagast. Ein stærsta seinni tíma áskorun fyrirtækja er að ná tökum á gögnunum sínum og þeirri verðmætasköpun sem fæst með skilvirkri vinnslu, notkun og miðlun þeirra. En við sjáum líka ríka þörf fyrirtækja fyrir ráðgjöf á sviði stefnuinnleiðingar og breytingastjórnunar sem m.a. byggir á þeim lærdómi sem gögn og upplýsingavinnsla færa okkur. Stefnumótunin sjálf er eitt en svo er það innleiðing stefnu með mælanlegum árangri sem er annað, þar geta margir gert svo miklu betur.“

Áhugaverð og spennandi áskorun

„Það er áhugaverð og spennandi áskorun að leiða nýtt félag sem byggir á þeim trausta grunni sem felst í farsælli sögu Expectus, reynslu og þekkingu sem þar er til staðar. Við munum áfram leggja mikla áherslu á gagnadrifna ákvarðanatöku, markmið, mælikvarða og mælaborð sem er og verður leiðarstef í öllum okkar verkefnum á sviði breytingastjórnunar og stefnuinnleiðingar. Á næstu misserum munum við byggja upp öflugt teymi og þróa þjónustu okkar og afurðir svo við getum orðið enn öflugri í þjónustu við íslenskt atvinnulíf, stofnanir og stjórnvöld á tímum umbreytinga og nýrra áskorana,“ er haft eftir Ingibjörgu Ösp í tilkynningu.

Þar segir að Ingibjörg Ösp hafi starfað sem ráðgjafi síðustu tvö ár, bæði sjálfstætt og fyrir Expectus auk þess sem hún er stjórnarformaður Hörpu. Áður hafi hún meðal annars starfað sem sviðsstjóri hjá Samtökum atvinnulífsins, hjá Samtökum iðnaðarins, verið framkvæmdastjóri Menningarhússins Hofs auk þess að hafa setið í stjórnum og komið að fjölda annarra verkefna. Ingibjörg Ösp sé viðskiptafræðingur að mennt með meistaragráðu í stjórnun og stefnumótun.